BOOM BOOM - veahka ráhkadeame ođđa sámi oanehisfilmma mii almmuhuvvo 2018s, ja rešissevra lea Per Josef Idivuoma. Sámi oktasašbuvttadeapmi: Bautafilm, Rein Film ja Idistudios. Govven: Mathis Ståle Mathisen.

Ráđđehusas goaiku eambbo ruhta sámi filmmaide

Internašunála Sámi Filbmainstituhtta oažžu buori lasáhusa 2018 stádabušeahtas kr 600 000 ja obbalaš ruhtadeapmi lea de 5.1 milliuvnna ruvnno ja dasa lassin boahtá Sámedikki njuolggo doarjja.

13:18 Golggotmánu 12. beaivi 2017
Ođastuvvon: 12.10.2017 - 15:01

Ráđđehus lasiha doarjaga 600 000 ruvnnuin Internašunála Sámi Filbmainstituhttii (ISFI). Lassáneapmi galgá leat sámi filmmaid ja buvttademiid nannemii.

 

Filbmadahkkiid gutni

Filbmainstituhta direktevra lea ilus lassáneami ovddas mii sihkkarastá ISFI viidáset doaimma ja sámi audiovisuála buvttademiid.

– ISFI ruhtadeapmi lassána stáđđásit jagis jahkái ja čájeha ahte sámi filmmat mearkkašuvvojit maiddái eisseválddiid bealis. Dát lasáhus láhčá buori geainnu ovddos guvlui ja ISFI ruhtadeapmi lea ge lassánan 30 % maŋemus guovtti jagis. Go jurddaša man ollu ISFI ruhtadeapmi lea lassánan maŋemus jagiid, de lea oalle mearkkašanveara ja leat sámi filbmadahkkit geat ánssášit gutni dán ovddas. Buriid sámi filmmaid haga, mat begget ja vuitet bálkkašumiid internašunálalaččat, dát ii livčče oba vejolaš ge, dadjá Internašunála Sámi Filbmainstituhta direktevra Anne Lajla Utsi.

 

Vel eambbo sámi filmmaid doarjut

Maŋemus guovtti jagis lea ráđđehus juolludan lagabut 30 proseantta eambbo doarjaga Internašunála Sámi Filbmainstituhttii.

– Dát lasáhus mearkkaša ahte mii sáhttit doarjut vel eambbo sámi filbma buvttademiid 2018is ja nanne maid ISFI doaimma, go oassi ruhtadeamis sáhttá maid geavahuvvut doaibmagoluide. Mii joatkit bargat Davviriikalaš ruhtadeami ovdii sámi guhkesfilmmaide ja ráidduide, ja mis lea buorre dialoga maid Ruoŧa ja Suoma eiseválddiiguin, muitala Utsi.

 

Illuda oaidnit eambbo sámi filmmaid

– ISFI lea huksen gelddolaš sámi filbmabirrasa, ja čájehan ahte lea stuora vejolašvuohta sámi filmma ektui. Diibmá čájehuvvui máilmmi vuosttaš lullisámi guhkesfilbma, Sameblod, ja lei hirbmat beroštupmi internašunála dásis maid, lohká kulturministtar Linda Hofstad Helleland preassadieđáhusas ráđđehusa neahttasiiddus.

– Fargga boahtá maid vuosttaš sámi guhkesfilbma mánáide ja nuoraide, Sáve, mii maid lea ožžon doarjaga ISFIs. Mun illudan oaidnit movt viidáset manná, dadjá kulturministtar Helleland.

På forsiden nå