ÁIDNA SUOMAS GEAT OŽŽO: Sámi Soster searvvi doaibmajođiheaddji Ristenrauna Magga lohká iežas daid stuorra ávvumállásiid maŋŋel measta njuorrasan. Vuorkágovva Astrid Helander.

– Liggii váimmu gullat man dehálaš barggu bargat

Eurohpá parlameanta geigii Sámi Soster searvái Eurohpá álbmotlahttu­bálkkašumi Brysselis. – Movttiidahttá searvvi bargat ain eanet sámiid ovdii, dadjá Ristenrauna Magga.

08:31 Golggotmánu 17. beaivi 2017

Sámi Soster-searvái geigejuvvui mannan gaskavahku virggálaččat Eurohpalaš álbmotlahttu -bálk­kašupmi Brysselis stuorra ávvudoaluin.

Bálkkašumi vieččaiga searvvi ságadoalli Pekka Aikio ja doaibmajođiheaddji Ristenrauna Magga.

 

Njuorrasan

Stuorra ávvumállásiid maŋŋel lei Magga measta njuorrasan, čállá searvi preassadieđáhusas.

– Liggii váimmu gullat man dehálaš barggu min searvi bargá. Das lea stuora mearkkašupmi olles searvái. Bálkkašumi eai atte vaikko geasa, dan deattuhedje ávvu­mállásiin, muitala Magga ja lohká dan addit movtta bargat ain eanet sámiid ovddas.

 

Eurohpái buorrin

Europarlamentarihkkár Sirpa Pietikäinen (Olgešbellodat) dat lei evttohan Sámi Soster searvái addit bálkkašumi.

Dát bálkka­šupmi lea ge juolluduvvon sidjiide juo geassemánus, muhto dál lágidedje virggálaš ávvudoaluid gos geigejedje dan searvái.

Dán bálkkašumi addet 50 olbmui dahje searvái geat leat joksan earenomáš mearkkašahtti olahusaid, bargguid ovddas main ovddidit ovttasbarggu riikarájáid rastá, ovdamearkka dihte riikkaidgaskasaš kulturovttas­barggu mii fas nanne Eurohpá-vuoiŋŋa. Suomas lea Sámi Soster áidna geat ožžo dán.

 

Háliidit buoridit diehtojuohkima

Sámi Sostera njunnošat áiguba Bryssela mátkki oktavuođas bargat sámiide buorrin. Prográm­mas leat máŋggat alladási deaivvadeamit dego ovdamearkka dihte deaivvadeapmi Eurohpá riekte­áššealbmáin.

Ságadoalli Pekka Aikio ja doaimmajođiheaddji Ristenrauna Magga galgaba deaivvadit maiddái Eurohpá kommi­šuvnna várreságadoallin Jyrki Katainenin.

Suinna Aikio ja Magga sagastallaba sámiid sajádagas Eurohpá uniovnna politihkas.

– Dál han dilli lea nu, ahte Eurohpá parlamentarihkkárat eai dieđe mo guđege mearrádus váikkuha sámiide, eaige sámit dieđe makkár mearrádusaid EU:s dahket. Dan dieđu galggašii oažžut johtit lunddolaččat ja njuovžilit goappáge guvlui. Bođii ovdan maiddái ávvumállásiin, europarlamentarihkkárat ja virgeolbmot eai gávnna álkit dieđuid dain mearrádusaid mat váikkuhit sápmelaččaide. Diekko livčče divustan veara, dadjá Magga.

 

Gosa gullet

Son lohká áigut maid jearrat gosa sámiid áššit gullet EU politihkas, ja movt sámiid sajádaga sáhttá nannet doppe.

Su mielas sámiid áššit galggašedje gullat EU siskkáldaspolitihkkii.

– Leat han sámit eamiálbmot, eai veahádat. Diet orru leamen oba váttis ášši man ovddidit, dat bođii jo ovdan beavdeságastallamiin ávvumállásiid oktavuođas, dadjá Magga preassadieđáhusas.

 

Fáddásánit
Ođđasat

På forsiden nå