NÁ II GALGGA: Dá lea ovdamearkka movt ii galgga. Dat sáhttá dagahit ahte massá vuodjingoartta. Govven: Frende

Heagga­váralaš láikodat

Hoahppu, galbmon gieđat dahje mánát mat čirrot ii leat doarvái buorre ágga ahte it fasko biilalásiid.

10:01 Golggotmánu 10. beaivi 2017

Hoahppu, galbmon gieđat dahje mánát mat čirrot ii leat doarvái buorre ágga. It ge sáhte vuoddját vaikko lea unna ráiggas šaddan lásii.

– Luoddajohtolatláhka lea áibbas čielggas. Son gii vuodjá galgá oaidnit juohke guvlui, dadjá Frende Forsikring Roger Ytre Hauge. Dat mearkkaša ahte ii galgga muohta, jiekŋa dahje mihkke eará unnidit oainnádaga dahje johtolatsihkarvuođa.

 

Čuohtenáre sáhku jahkásaččat

Sáhkkohit lea politiijaid dábá­leamos reakšuvdna go bissehit biilla mas ii leat doarvái oainnádat. Juohke jagi čállet geaidnopolitiijat máŋgačuođi sáhku dan dihte.

Dábálaččat lea sáhkku 2000 ruvnno, muhto sáhttá leat vel eambbo, dahje massit vuodjingoartta.

– Ii leat ávki faskut eret jieŋa láses, jus siskkobealde lea bihci. Mađi unnit oainnát, dađi jođá­neappot massát vuodjingoartta, dadjá geaidnopolitiijaid hoavda, Runar Karlsen.

– Galgá dieđusge oaidnit goappašat guvlui maid, ii dušše ovddos. Speadjaliid ja maŋŋe­láseráigge maid.

 

Earáide váralažžan

– Beroškeahttá galggat go dušše rámbuvrras finihit vai maid, de sáhttá muohta dahje jiekŋa daga­hit ahte massát vuodjin­goartta. It ge dušše dan, muhto sáhtát earáide leat sorbmin, čilge Ytre Hauge.

– Sáhtát earáid njeaiga vuodjit dahje earáid roasmmehuhttit. Lea váralaš jurddašit ahte «diet ii geava muinna». Ii goasse leat nu hoahppu ahte it astta faskulit biilalásiid. Moatti minuhtas leat faskulan daid, lasiha son.

 

 Massát vuodjingoartta

Jus it oainne ovddos ja goappašat guvlui doarvái bures, de don váidot.

– De mii váldit konkrehta árvvoštallama man duođalaš dat lei, ja sáhtát sáhkkohallat 5000 ruvnnuin dahje eambbo. Dasa lassin massá vuodjingoartta golmma mánnui dahje eambbo, muitala geaidnopolitiijaid hoavda, Runar Karlsen.

 

Láikkes váhnemat

Dávjá leat váhnemat doalvume mánáid skuvlii, eai ge gille faskut biilalásiid. Láikodat sáhttá leat heaggaváralaš.

– Go vuodjá luottain gos olbmot vánddardit, earret eará skuvllaid lahka, de lea earenoamáš dehálaš oaidnit juohke guvlui, dadjá Karlsen.

Fáddásánit
Ođđasat

På forsiden nå