Gieldda- ja ođasmahttinministtar Jan Tore Sanner. Vuorkágovva: Inga Marie Guttorm

Eanet dienas galgá báhcit Davvi-Norgga fitno­dagaide

Davviguovlluidstrategiija čuovvoleapmái evttoha ráđđehus juolludit 17 miljovnna ruvnnu.

15:29 Golggotmánu 12. beaivi 2017

Ráđđehusa ulbmil lea lasihit árvoháhkama davvinorgga fitnodagaide daid riggodaga vuođul  mat leat dain guovlluin.

 – Davviguovlluidstrategiija čuovvoleami oktavuođas áigu ráđđehus vuoruhit buvttadanovddideami  «Badjeleappos árvogeavllis». Vuoruheapmi álggahuvvui 2017:s ja galgá doaibmat 2020 lohppii. 2018:s lea dasa biddjon 17 miljovnna ruvnnu, čállá gieldda- ja ođasmahttinministtar Jan Tore Sanner preassadieđáhusastis.

 

Láhčet dili ovddidit eanet buvttadanfitnodagaid

Viidáseappot čállá son ahte leat stuora ovdánanvejolašvuođat davviguovlluin mat mearkkašit olles riikii. 

Mearrabiebmu, petroleuma, ođasmahtti energiija, fanasjohtolat ja mátkeealáhus leat ahtanušši ealáhusat. Davvi-Norggas lea lassáneapmi stuorát go muđui riikkas, ja leat plánejuvvon stuorit investeremat dohko.

– Ráđđehus háliida ahtanuššiealáhusaid ja vurdojuvvon investeremiid háhkat stuorit váikkuhusain dáidda guovlluide riikkas. Dainna vuoruhemiin áigu ráđđehus láhčit dili nu ahte sáhttet ovddidit eanet buvttadanfitnodagaid mat nákcejit gilvalit ja eanet bargosajiid ahtanuššiealáhusaide, lohká Jan Tore Sanner.

 

Vuoitit stuorát šiehtadusaid

Dát vuoruheapmi golmmain doaimmain, galgá oažžut fitnodagaid loktanit badjelii árvogeavllis.

Doaimmat leat, ovttasbargu vuoitit stuorit šiehtadusaid, oktavuođaid huksen gaskal dutkanbirrasiid ja davvinorgga fitnodagaid, ja dasto gelbbolašvuođalokten fitnodagain daid bargguid bokte maid Nordlándda, Romssa ja Finnmárkku fylkkasuohkanat čađahit lassi- ja joatkkaoahpuid ovddidemiid bokte.  

Vuoruheapmi boahtá ovdan lagas ovttasbarggu bokte gaskal ráđđehusa, fylkasuohkana, Sámedikki, Innovašuvnna Norgga ja Dutkanráđi.

Fáddásánit
Ođđasat

På forsiden nå