Tunneallat oanidit mátki johtolagas, ja Davvi-Norggas oatnu E6 luodda 30 kilomehteriin. Čájáhusgovva; Knut Falch / SCANPIX

E6 luodda oatnu 30 km boahtte jagi

E6 luodda oatnu golmmain miillain go Hålogalándašaldi ja ođđa E6-prošeavttat rahpasit johtolahkii Álttás ja Davvi-Romssas boahtte jagi.

10:07 Golggotmánu 13. beaivi 2017

Ráđđehus dohkkeha álggahit guokte ođđa luoddaprošeavtta boahtte jagi.

Sieiddebávttetunnealla álget boahtte jagi hukset E69 luottas Finnmárkkus, ja E6 luodda Kapskarmo-Brattåsen-Lien báikkis, mii lea maŋemus luoddabihttá Helgelánddas mii lea divodeami vuolde.


– Lean duhtavaš go fargga leat olihan viiddis buorideami luoddabihtáin, ja go leat divvon guovlluid gos uđasvárra lea ja muđuid standárda lea buorránan, dadjá guovlluluoddahoavda Torbjørn Naimak. Govven: Knut Opeide, Statens vegvesen.

 

Loahpaguvlui E6 prošeavttain

Stádabušeahtta sihkkarastá daid prošeavttaid mat leat jo jođus Davvi-Norggas, čállá Stáda geaidnodoaimmahat. Lassin doaimmaide mat leat jo jođus, de vuoruhuvvojit tunneallat ráđđehusa bušeahta bokte.

Davvi-Norgii lea várrejuvvon 380 milliuvnna ruvnno divodit tunneallaid.

– Lea nanu bušeahtta riikkageainnuide, mii sihkkarastá buot luoddaprošeavttaid ja tunneallabargguid. Lea illudahtti go beassat álggahit maŋemus osiin Helgelánddas ja Sieiddebáktetunneallain, dadjá guovlluluoddahoavda Torbjørn Naimak.

 

Almmuhit guđa jagi plánaid

Ihttin almmuha Stáda geaidnodoaimmahat doaibmabijuid boahtte guđa jagi ovddas.

De almmuha doaimmahat doaibmaprográmma evttohusa, mii lea konkretiserejuvvon oassi Našunála fievrredusplána 2018–2029, maid Stuoradiggi gieđahalai árrageasi.

På forsiden nå