BARGOVEAHKA: Doaktárat Sirin Sundnes turnusdoavttir, Therese Hildan, Marit Karlsen, Siriann Gulsrud (virgelobis dál) ja Ann Karine Gaup barget bálkká haga guokte maŋŋelgaskabeaivvi dán vahkku. Suohkandoavttir Tuija Niiranen ii šaddan mielde govvii. Govva: priváhta govva.

Guovlal doaktára luhtte ja iskka iežat áibbas nuvttá

Guovdageainnu doaktárat fállet áibbas nuvttá seallaiskosiid doavtterkantuvrras odne, disdaga ja ihttin, gaskavahkku.

15:01 Čakčamánu 12. beaivi 2017
Ođastuvvon: 12.09.2017 - 15:03

Áidna maid don dagat, lea mannat Guovdageainnu doavtterkantuvrii ja čohkkedit vuordit iežat vuoru.

Iskkadeapmi ii mávsse maidege, ja lea áibbas nuvttá, geažuhit Guovdageainnu doaktárat sosiála mediain geat barget dán barggu bálkká haga.

GOAŦŦOČOTTABORASDÁVDA

Buot gaskal 25- ja 69-jahkásaš nissonolbmot ávžžuhuvvojit váldit seallaiskosa goaŧŧočoddagis juohke goalmmát jagi. Jus lea badjel golbma jagi áigi go maŋemus leat váldán iskosa, de ožžot nissonat reivve Borasdávdasearvvis mas muittuhuvvo ahte lea áigi diŋgot áiggi doaktára lusa ja váldit iskosiid.

Juohke jagi ožžot 300 nissonolbmo Norggas borasdávdda goaŧŧočoddagis. Seallaiskkus sáhttá fuomášit duođalaš seallarievdademiid mat sáhttet šaddat goaŧŧočottaborasdávdan. Dan rájes go kampánja álggahuvvui, de leat 34 000 eanet nissonolbmo váldán dán iskosa, ja sin gaskkas fuomášedje 1400 duođalaš seallarievdadeami.

Dieđut: kreftforeningen.no

 

Ii dieđe sullásaš doaimmaid

– Buot suohkana doaktárat leat mielde dás. Midjiide lea nu dehálaš ášši ahte mii áinnas bidjat guokte maŋŋelgaskabeaivvi dasa, lassin bargovahkkui mii mis lea, muitala fástadoavttir Marit Karlsen Altaposten avisii.

Son jáhkká ahte dát nuvttá doaibma lea oalle earenoamáš ii ge dieđe leat go eará doaktáriin seammá sullásaš doaimmat eará sajiin Norggas.

Čakčamánu 19. beaivvi čađahit gynekologat Norggas sullasaš kampánjja, dain báikkiin gos gynekologadoavttir lea gávdnamis. Gynekologa lusa gal ferte juohkehaš diŋgot áiggi, muhto Guovdageainnus lea fálaldat mas beasat guovlalit nu ahte it diŋgo áiggi doaktára lusa, mii ii leat dábálaš ortnet.

 

Guovdageainnus seallaiskosat leat čakčamánu 12. beaivvi ja čakčamánu 13. beaivvi gaskal diibmu 15.30 – 20.00.

På forsiden nå