Kaja-Regine (olgeš bealde govas) ja Maja Stina Bientie eaba gávdnan dan jienastanlihpu man leigga áigon jienastit go leigga eará válgabiirres jienasteame. Priváhtagovva.

Eaba gávdnan jienastanlihpu man ozaiga

Sihke Kaja-Regine ja Maja Stina Bientie leaba beahtahallan ja dadjaba ahte válggat eai oro profeššuneallat ja ahte dát váikkuha Sámedikki luohttevašvuhtii.

15:18 Čakčamánu 11. beaivi 2017

Lea VG mii muitala sudno jienastanmátkki birra go eaba gávdnan Åarjel-Saemiej Gïelh listtu man leigga ozus jienastanbáikkis.

Soai jienasteigga eará bellodaga sámediggeválggas, go eaba diehtán ahte lea vejolaš ieš čállit bellodaga nama guoros jienastanlihppui, go jienasta nuppi báikkis Norggas.

 

Mearkkašit bures buot jienaid

Åarjel-Saemiej Gïelh bellodaga vuosttaševttohas, Ellinor Marita Jåma ii liiko go sin bellodat sáhttá massán jienaid go válgavuogádat ii doaimma.

– Mu mielas lea issoras váivi. Midjiide čuohcá dát hui ollu. Jus massit ovtta dahje vihtta jiena, de dat mearkkaša midjiide ollu. Mu mielas lea roassun go vuogádagat eai doaimma, lohká Jåma.

 

Jienasteaddjis maid ovddasvástádus

Sámedikki dievasčoahkkinstába ossodatdirektevra Rávdná Buljo Gaup lohká Sámedikki sáddet ollu jienastanlihpuid iešguđet jienastanguovlluide.

– Diehtojuohkin sáhtášii šaddat vel buorebun, muhto leat álo muhtin jienasteaddjit geat eai oaččo buot dieđuid. Mii eat sáhte buot olbmuid jienastuslogus oahpahit. Jienasteaddjis ferte maid alddis leat ovddasvástádus iskat movt njuolggadusat leat, muitala Gaup VG:i, ja lohká váldit ášši mielde válggaid árvvoštallamii.

Fáddásánit
Ođđasat

På forsiden nå