DUTKET: Politiijat leat dutkame lihkohisvuođa mas nieiddaš vuddjui Guovdageainnus gaskavahku veaigin. Govven: Ellen Marianne Siri

– Helikopteriin dolvon buohccivissui

Nieiddaš, gii vuddjui gaskavahku sullii 15:00 áigge Guovdageainnus, lea dolvojuvvon helikopteriin UNN buohccivissui Romsii.

15:31 Borgemánu 16. beaivi 2017
Ođastuvvon: 17.08.2017 - 08:20

Nieiddaš lei álggos dolvojuvvon Guovdageainnu dearvvašvuođaguovddážii gos helikopter vieččai gaskavahku veaigin.

UNN buohcciviesu gulahallanolmmoš Jan Fredrik Frantzen muitala ahte nieiddaš lea joavdan buohccivissui. Dál, diibmu 18:49, muitala son ahte nieiddaš lea garrasit roasmmehuvvan, muhto lea stabiila.

 

Garra beaškkeheapmi

Finnmárkku politiguovllu operašuvdnajođiheaddji Bjørn Gunnar Johnsen muitala Ávvirii ahte sii eai ge dieđe vuos man bahuid nieiddaš nuoraidskuvlaagis lea roasmmehuvvan.

– Dan birra eai leat dál vuos makkár ge dieđut, muhto lea leamaš oalle garra oktiibeaškkiheapmi. Mu dieđuid mielde seaivvui helikopter Guovdageidnui 16:00 áigge ja nieiddaš lea dolvojuvvon UNN buohccivissui, muitala Johnsen.

 

Dutket

Bjørn Gunnar Johnsen muitala ahte sii dutket dábálaš vugiid mielde lihkohisvuođa. Vuodjingoartta leat váldán biilavuoddjis, gii lea badjel 60-jahkásaš dievdu, nu go lea dábálaš dákkár lihkohisvuođain.

Johnsen ii sáhte maide dadjat lea go nieiddaš vuddjon luotta rasttildanbáikkis dahje lea go ságas ahte nieiddaš lea vuddjon skuvlageainnus. Son ii ge sáhte biilla leahtu ektui maide dadjat.

– Dat šaddá dušše árvádaddan, go leat easka dutkame lihkohisvuođa. Muhto eat várut dievddu vuodján gárrenoaivvis, lohká Johnsen.

Fáddásánit
Ođđasat

På forsiden nå