Majestehtalaš loahpaheapmi

Kruvdnaprinsa Haakon galleda Evenášši ja áiggu oassálastit sámi visteregistrerenprošeavtta loahpahančalmmusteapmái.

16:00 Suoidnemánu 14. beaivi 2017
Ođastuvvon: 17.07.2017 - 10:43

Gonagaslaš Majestehta Kruvdnaprinsa Haakon oassálastá sámi visteregistrerenprošeavtta loahpahančalmmusteapmái maŋŋebárgga borgemánu 29.beaivve. 2017 Gállogietti olgomuseas Evenášši suohkanis.

– Min mielas lea hui mávssolaš go Gonagaslaš Majestehta Kruvnnaprinsa Haakon áigu oassálastit loahpahančalmmusteamis, lohka sámediggepresideantta Vibeke Larsen preassadieđáhusastis.

 

Guhkit áigge registreren sámi visttiid

Sámediggi lea ovttas Riikaantikvárain ja Dálkkádat- ja birasdepartemeanttain identifiseren ja registreren sámi visttiid mat leat huksejuvvon ovdal 1925.

Prošeavtta áigumuš lei oažžut ovdán dieđuid ráfáidahttojuvvon sámi visttiin Norggas. Prošeaktaáigodagas 2011 rájes leat registrerejuvvon sullii 800 vistti, Plassje rájes lulde gitta Deanu rádjái davvin.


Sámedikki preassagovva

Sámi kultuvra oidnosis

Sámediggepresideanta Vibeke Larsen lohká registreremat leat mielde oainnusin dahkamin sámi kultuvrra ja identitehta sihke báikkálaččat ja riikkaviidosaččat.

– Visttit leat dehálaš gáldun sámi báikegottiid máhttui ja historjái miehtá riikka. Visttiid bokte oažžut dieđuid sihke sámi servodaga ja ovttaskas bearrašiid ja sogaid birra doppe gos visttit lea geavahuvvon buolvvaid čađa, dadjá Vibeke Larsen.

Dálkkádat- ja birasminister Vidar Helgesen ja riikaantikvára Jørn Holme boahtiba maid doaluide.

 

Fitná Skániin maid

Maŋŋel čalmmusteami Gállogiettis galgá Kruvdnaprinsa fitnat Borris Skániin gos son galgá geahččat sámi láđu mii lea sullii 1850 – logu rájes, man dál leat ođasteame.

Fáddásánit
Ođđasat

På forsiden nå