GARRASA VUOLLAI VÁLDIT DEPARTEMEANTTA: NBR nubbiovdaolmmoš, Per John Anti, ii áiggo litnagieđain šat gieđahallat áššiid. Sii loktejit SNO/NOS-ášši Biras- ja dálkkádatdepartementii áššin boahtte vahku čoahkkimis. Čoahkkin mii lea juo áigá plánejuvvon. Govven: Inga Marie Guttorm (vuorkágovva)

– Vuogádat mot duođaštit borapire­vahágiid ferte rievdat

Norgga Boazosápme­laččaid Riikkasearvi áigu dál loktet ášši Biras- ja dálkkádatdepartementii, go sii oaivvildit ahte dálá vuogádat, mas okta olmmoš akto mearrida mii lea boraspirii goddon ja mii ii leat, dat ii leat oba dohkálaš ge.

18:45 Geassemánu 18. beaivi 2017
Ođastuvvon: 19.06.2017 - 08:25

Ávvir lea čállán áššiid go Stáhta Luonddubearráigeahču (SNO) bargit leat mielde stivrrain searvvis man mihttu lea gáhttet goaskima, namalassii Norgga Ornitologalaš Searvvis, seammás go galget duođaštit ráppiid maid juste goaskin lea goddán.

Seammás lea SNO-bargi, Ken Gøran Uglebakken, son geas lea loahppamearrádus duođaštusain maid eará SNO-bargit leat duođaštan ja gávnnahan ahte lea goddon boraspirii.

Dan sáhttá Uglebakken hilgut, jus su mielas eai oro doarvái duođaštusat ahte duođaid lea ráfáidahtton boraspire mii lea goddán dan ealli.

 

Loga maid: – Bilidit iežaset luohtehahtti­vuođa

 

Ii dohkálaš

Norgga Boazosápmelaččaid Riikkasearvvi nubbiovdaolmmoš, Per John Anti, reagere garrasit vuogádahkii mas Uglebakken akto bargá dien barggu.

– Min mielas lea dohkkemeahttun ahte okta olmmoš galgá okto mearridit, govaid vuođul, maid eará SNO-bargit leat duođaštan goddon boraspirii, ahte lea go su mielas duođaid goddon ráfáidahtton boraspirii. Doppe ii leat rehálašvuohta, lea maid ehtalaš gažaldat go sus leat diekkár čanastagat, ja maid lea sáhka bealálašvuođas, lohká Anti.

Uglebakken lea son gii loahpalaččat mearrida lea go rábbi duođaštuvvon riekta, ja dan son dahká daid govaid vuođul maid eará SNO-bargit leat govven duođašteami oktavuođas.

 

Ekonomalaš gažaldat

Anti maid lohká ahte mearrádusat mat dahkkojit Álttá SNO-kantuvrras, čuohcá olles Finnmárkku boazodollui, ja son čilge manin:

– Vuos álggos jus Uglebakkena mielas ii leat goddán boraspire dan bohcco man nubbi eará SNO-bargi lea duođaštan goddán, de ii oaččo boazoeaiggát máksot dan bohcco ovddas. Finnmárkku Fylkkamánnis lea maid mearrádus ahte unnimusat vihtta proseantta galget duođaštuvvon goddon boraspiriide, dan vuođul oažžu árvvoštallama vuođul máksot 95 proseantta ovddas. Mađi vuollelii proseanta duođaštuvvon šaddá, dađi unnit oažžu árvvoštallama vuođul máksot boraspirevahátbuhtadusa, čilge Anti movt ekonomalaš boađus sáhttá leat.

 

– Statistihka rievdada

Anti čilge ahte leat dego golbma dási go árvvoštallet ráppi.

Vuosttaš vuos duođaštuvvon goddon, nubbi jáhkkimis goddon ja goalmmát eahpesihkar.

Son muitala ahte jus eahpesihkar stáhtusa oažžu rábbi, de ii oaččo máksot das maidege. Jus jáhkkimis lea goddon dahje duođaštuvvon goddon, de oažžu ollásii mávssu.

– Muhto das lea maid eará boađus jus duođaštuvvon rábbi rievdaduvvo «jáhkkimis goddon boraspirii». Dalle ain oažžu mávssu ráppis, muhto de ii boađe statistihkaide ahte lea duođaid boraspire goddán, ja dat dagaha ahte ii boađe statistihkkii ahte lea goddon boraspirii, ja de šaddat mii gielisin, lohká son.

 

– Maid áigubehtet dahkat NBR bealis dáinna áššiin? 

– Mis lea čoahkkin Biras- ja dálkkádatdepartemeanttain boahtte vahku. Doppe mii loktet dán áššin digaštallamii. Mii gáibidit unnimusat ahte dát vuogádat rievdá go okta olmmoš lea buohkaid badjel mearrideaddji go galget duođaštit ráppiid goddon boraspiriide, lohká son vel loahpas.

 

Ávvir lea geahččalan fáhtet Stáhta luonddubearráigeahčus ja Birasdirektoráhtas kommentára dáid áššiide, muhto eat leat lihkostuvvan.

Stáhtá Luonddubearráigeahču bealis leat gieldán bargiid vástideames mediaid gažaldagaide.

 

På forsiden nå