OLU BARGU: Muohtačorgenbargiin ii leat váilon bargu mannan dálvvi. Preassagovva: Stáhta Geaidnodoaimmahat

Lossa dálvi muohta­čorge­jeddjiide

Mannan dálvvi leat vuodján 3 437 000 kilomehtera čorgen dihte muohttaga.

14:16 Geassemánu 22. beaivi 2017
Ođastuvvon: 22.06.2017 - 14:44

Mannan dálvi lei guhkit go dábálaččat, ja dat dagahii ahte guovddáš geainnut duoddariid badjel Finnmárkkus ledje giddejuvvon guovtte gitta golmma geardde eanet go diibmá, ja ahte leat šaddan čorget muohttagiid luottaid alde 456 000 kilomehtera eanet diimmá ektui.

– Mii leat hárjánan ahte muhtun dálvvit leat eanet hástaleaddjit go earát. Earenomáš mannan dálvvi lei  earenomáš olu muohta ja guhkes áigodat go ledje hástaleaddji dálkkit olles fylkkas, dadjá Kurt Mørk Eriksen preassadieđáhusas. Son lea Finnmárkku Stáhta geaidnodoaimmahaga doaimma ja divodeami prošeaktajođiheaddji.

Dán jagi čorgejedje muohttagiid maŋimuš geardde geassemánu 5. beaivvi, ja dan dahke Báhcavuonaváris.

 

Luoddagidden duppalastojuvvon

Logut geaidnojohtolatguovddážis čájehit ahte luottat leat leamaš gitta earenomáš olu mannan dálvvi.

E6 Suoidneleavššis lei gitta 56 beaivvi, mii lea golmma geardde eanet go diibmá. E6 Háhttiraččas lei fas gitta 19 beaivvi, mii diibmá lei gitta dušše guktii. E69, mii manná Davvinjárgii, lei gitta 84 beaivvi ja fylkkaluodda 891 Báhcavuonaváris 57 beaivvi, mii lea beali eanet diimmá ektui.

Ráidovuodjima logut čájehit maiddái sullasaš tendeanssaid.

 

Muohtačorgen lassánan

– Mii bargat maid sáhttit doallan dihte luottaid rabasin, ja muohtačorgen lassánii muhtun guovlluin fylkkas. Liikká šattaimet mii giddet luottaid ja vuodjit ráiddus dávjjit go dábálaččat, dadjá Kurt Mørk Eriksen.

Mannan dálvvi lea muohta čorgejuvvon ollislaččat 3 437 000 kilomehtera riikka- ja fylkkaluottain Finnmárkkus, mii lea 15 proseantta eanet go diibmá. Mátta-Várjjagis, Davvinjárggas ja Porsáŋggus lassánii muohtačorgen eanemus kilomehteriid ektui, ja lassánii badjel 20 proseanttain diimmá ektui.

Čorgašis, Várjjagis ja Hámmárfeasttas lei unnimus lassáneapmi, muhto dáin guovlluin lei maiddái mearkkašahtti lassáneapmi.

 

Eanet moaitagat

Garra dálkkit leat mielddisbuktán olu moaitagiid johtaleddjiin.

– Mii áddet ahte olbmot leat jierásnuvvan go eai joavdda nu movt ledje plánen, muhto mii eat sáhte dálkkiin bargat maide, ja logut čájehit ahte mannan dálvi lea leamaš earenomáš vearrái, muitala Kurt Mørk Eriksen.

Muhtumin dáhpáhuvvá ahte entreprenevrrat eai deavdde gáibádusaid muohtačorgemii ja divodeapmái Stáhta geaidnodoaimmahaga kontrávtta mielde. Dát áššit čuvvojuvvojit dađistaga.

– Mii oaidnit ahte standárdakontrávttat eai leat álo doarvái bures heivehuvvon váttis dálvesiivvuide, maid mii vásihit Finnmárkkus. Dán mii meinet dárkkistit ođđa kontrávttain. Das sáhttá leat ovdamearkka dihte rusttegiin sáhka, dadjá Finnmárkku Stáhta geaidnodoaimmahaga jođiheaddji.

 

Garra bargu

Son deattuha ahte entreprenevrrain lea buorre ovttasbargu.

– Leat oallugat geat barget buori barggu sihkkarastin dihte luottaid Finnmárkkus, ja dán dálvvi lea sis leamaš earenomáš hástaleaddji bargu. Dál ánssášit sihke entreprenevrrat ja johtaleaddjit guhkes bottu ovdal boahtte dálvvi, oaivvilda Kurt Mørk Eriksen.

 

Fáddásánit
Ođđasat

På forsiden nå