Lihkohisvuođat ja rikkeremat

Mannan ija ledje máŋga lihkohisvuođa ja rikkeremat Finnmárkkus. Dán čállá Finnmárkku politiijaguovlu Twitteris.

10:46 Geassemánu 10. beaivi 2017

Áltá

Politiijat Álttás šadde vuolgit muhtin dállui gos dieđihuvvui doarrun. Muhtin albmás 30 jagiin lei hávvi oaivvis. Politiijat válde gitta vearredahkki gii lei muhtin almmái 30 jagiin. Dán dieđihit politiijat dii 7.44 Twitteris.

 

Álttás lei biilalihkohisvuohta, dan dieđihit politiijat dii 5.44, sullii 200 mehtera Bossogohpi geaidnoearus, Guovdageaingeainnus. Ii oktage lean roasmmohuvvan, biila lei vuodján geaidnoáidde njeaiga.

 

Deatnu:

Politiijat ožžo mannan ija, dii 2.25, dieđu ahte Suolonuoris Deanus lei njealjejuvllagiin lihkohisvuohta. Muhtin almmái 50 jagiin lei roasmmohuvvan ja dolvojuvvui Kirkonjárgga buohccivissui. Almmái várohuvvo juhkanvuođas vuodján. Politiijat dutket ášši.

 

Riehváhki:

Politiijat čállet Twitteris dii 2.05 ahte Riehvágis lei biilalihkohisvuohta mannan ija. Biila lei vuodján badjel geainnu, Rg 175. Muhtin olgoriikalašalmmái 30 jagiin várohuvvo leat juhkanvuođas vuodján. Almmái dolvojuvvui dearvvašvuođaguovddážii gos válde varraiskosa. Politiijat dutket ášši.

 

Kirkonjárga

Dii 1.53 čállet politiijat Titterii ahte šadde doalvut muhtin albmá butkái. Almmái lei hámmanguovllus ja lei nu juhkan ii ge diehtán gos son ba leage.

 

Dii 3.00 dieđihit politiijat Twitteris ahte Kirkonjárggas ožžo sii dieđu ahte droššebiila vuordinráiddus lei muhtin juhkanalmmái rikkeremin. Politiijat vižže albmá ja bidje su giddagassii politiijalága §9 vuođul.

 

Hámmárfeasta:

Dii 00:42, Hámmárfeasttas lei rikkeara muhtin dálus mii muosehuhtii earáid. Politiijat fidne báikkis bisseheamen rikkeara.

 

Politiijat čállet maid Twitteris ahte nu ollugat riŋgejit politiijaid heahtenummirii mii lea 112, geat eai leat heađis. Dát dagaha ahte šaddet boastut prioriteret máŋga ášši. Politiijat ávžžuhit baicce daid riŋget geat eai leat heađis dán nummarii: 02800. Dát šaddá buoret sihke politiijaide ja Finnmárkku álbmogii.

Fáddásánit
Ođđasat

På forsiden nå