VÁLDÁ DUOĐAS: Raporttas boahtá ovdan ahte ollugiin lea unnán luohttámuš politiijaide ja veahkkeapparáhtii, danne go veahkkeapparáhtas váilu earret eará giella- ja kulturgelbbolašvuohta, muitala sámediggeráđđi Mariann Wollmann Magga. Govven: Åse M.P. Pulk-Sámediggi

Veahka­válddálaš­vuohta lagas birrasis: – Ollugiin lea unnán luohttá­muš politiijaide ja veahkke­apparáhtii

Raporta veahkaválddi birra lagaš oktavuođain sámi servodagas čuovvoleapmin, bovde Sámediggi sámi gielddaid ovttasbargat buoridan dihtii fálaldaga sidjiide geat vásihit veahkaválddi lagaš oktavuođain.

12:35 Geassemánu 13. beaivi 2017
Ođastuvvon: 13.06.2017 - 13:57

Nationála máhttoguovddáš veahkaválddi ja traumáhtalaš huša birra lea čađahan dutkama veahkaválddi birra lagaš oktavuođain sámi servodagas ja raporta almmuhuvvui Sámedikkis njukčamánu 8. beaivve  2017 Kárášjogas.

Raporta «Jos duosttat jearrat, dustet olbmot vástidit» lea ráhkaduvvon ságastallamiid vuođul fágaolbmuiguin ja veahkkeapparáhtain sámi guovlluin, ja čuvge movt veahkaválddi gillán sápmelaččat deaivvadit veahkkeapparáhtain.

Raporttas lea maiddái iskojuvvon ahte leatgo sámi servodagas ja dan olggobealde bealit mat váikkuhit veahkaválddi šaddamii.

 

Ferte váldit duođas bohtosiid

Raporttas boahtá ovdan ahte ollugiin lea unnán luohttámuš politiijaide ja veahkkeapparáhtii, danne go veahkkeapparáhtas váilu earret eará giella- ja kulturgelbbolašvuohta, muitala sámediggeráđđi Mariann Wollmann Magga Sámedikki preassadieđáhusas.

Mii fertet váldit duođas bohtosiid, ja eiseválddit fertejit álggahit doaibmabijuid ovttasbargguin sámi servodagain, gielddaiguin ja Sámedikkiin. Raporta lea deaŧalaš gaskaoapmi dán barggus, dadjá Magga.

 

Ulbmil addit buoret fálaldaga

Sámediggeráđđi Mariann Wollmann Magga dadjá ahte čoahkkimiid ulbmilin lea oahpásmahttit raportta gielddaide, ja oažžut čuovvolanplána dan ektui movt gielddat sáhttet dahkat rievdadusaid ja addit buoret fálaldaga sidjiide geat vásihit veahkaválddi lagaš oktavuođain.

– Dasto lea sávahahtti oažžut ovdan maid gielddat vurdet Sámedikkis čuovvolanbarggus viidáseappot, dadjá Magga.

 

Čuovvolančoahkkimat

Sámedikki presideanta Vibeke Larsen ja ráđđelahttu Mariann Wollmann Magga doallaba čoahkkima Justiisa- ja gearggusvuođadepartemeantta mánáid- ja dásseárvoministariin Solveig Hornein duorastaga geassemánu 15. beaivve raportta čuovvoleami birra.

Vuosttaš čoahkkin raportta birra dollojuvvui geassemánu 7. beaivve 2017 Romssa suohkaniin. Dasto galgá dollojuvvot čoahkkin Snoasa suohkaniin geassemánu 12. beaivve.

Dasa lassin lea bivdojuvvon čoahkkin Divttasvuona suohkaniin, muhto dat lea doaisttážii eahpečielggas.

På forsiden nå