Stuoradikkis lea eanetlohku duohtavuođakommišuvnna ásaheapmái, dál go Bargiidbellodat maid almmuhii ahte sii áigot doarjut guorahallama. Vuorkágovva: Ávvir.

Illu go Stuora­dikki eanet­lohku doarju duohta­vuođa­kommišuvnna

Gaskavahku dieđihii Bargiidbellodaga stuorradiggejoavku ahte sii dorjot dan evttohusa, ásahit duohtavuođakommišuvnna mii galgá guorahallat dáruiduhttima.

11:30 Geassemánu 08. beaivi 2017
Ođastuvvon: 08.06.2017 - 13:29

Risttalaš Álbmotbellodat, Gurutbellodat, Birasbellodat Ruonát ja Guovddášbellodat leat jo dorjon dan evttohusa maid Sosialisttalaš Gurutbellodat lea evttohan. Dál duođašta Bargiidbellodat maid NRK:i ahte sii áigot doarjut dán ásaheami.

Ovddádusbellodat lea cealkán ahte sii eai doarjjo dán guorahallama, ja Olgešbellodat ii leat vel mearridan maidege áššis.

 

Sihkkarastet mandáhta

Norgga Sámiid Riikkasearvvi sámediggeáirras Henrik Olsen giitá buohkaid geat leat čuvgen dárbbu dakkár kommišuvdnii, ja Sosialisttalaš Gurutbellodaga gii lea duvdán ášši ovddasguvlui Stuoradikkis.

– Mannan vahkku bijaimet ášši hoahppoáššin Sámedikkis, vai Stuoradiggi oažžu čielga dieđu sámi servodagas. Dál álgá bargu sihkkarastit ahte mandáhtta šaddá buorre, ja ahte biddjojit doarvái resurssat dan barggu čađaheapmái, muitala Olsen.

 

Dárbbašlaš bargu

Bargiidbellodaga stuorradiggejoavkku jođiheaddji Martin Kolberg oaivvilda ahte dakkár kommišuvdna lea dárbbašlaš.

– Dát ášši lea guhká ja vuđolaččat gieđahallon. Ja dan bokte lea čielgasit boahtán ovdan ahte mii fertet čohkket dakkár historjjálaš duođaštusaid, ja gávdnat ođđa historjjálaš dieđuid ja oaidnit makkár oahpu mii das gávdnat, lohká Kolberg.

Ášši galgá gieđahallot dárkkistan- ja vuođđudanlávdegottis geassemánu 13. beaivvi. Stuoradiggi meannuda lávdegotti evttohusa geassemánu 20.beaivvi.

(©NTB)

På forsiden nå