Ráđđeaddinadvokáhtta Edel Hennie Olsen ja áktor Torstein Lindquister áššis mas 59-jahkásaš dievdu lea dikkis go lea goddán iežas eamida ja biebmobártni borgemánus diibmá. Govven: Jan-Morten Bjørnbakk / NTB scanpix

Dubme­halai 21 jagi gidda­gassii Girko­njárgga goddin­áššis

59-jahkásaš dievdu dubmehalai čohkkát 21 jagi go gottii iežas eamida ja su bártnáža Girkonjárggas diibmá. Dievdu guoddalii duomu, dieđiha NRK.

15:05 Geassemánu 22. beaivi 2017
Ođastuvvon: 22.06.2017 - 15:26

Duopmu celkui Nuorta-Finnmárkku diggegottis duorastaga ja lea áktora čuoččuhusaid vuođul.

 

Lei háliidan earránit

Borgemánu 29. beaivvi bážáhalaiga ja jámiiga 37-jahkásaš Pimsiri Songngam ja su 12-jahkásaš bártnáš Petchngam Songngam.

Áktor Torstein Lindquister govvidii goddima leat hui hirpmusin ja ilgadin go ákkastalai dikkis mannan vahkku. Son čuoččuhii ahte dáhpáhus vulggii dušši áššis.

59-jahkásaš dievdu muitalii ahte son áiggui earránit ja siđai eamida fárret.

 

Vieččai hávlára

Goddimat dáhpáhuvve beaivvi ovdal go Pimsiri Songngam ja su bártnáš galggaiga fárregoahtit ođđa ásodahkii man Girkonjárgga heahteguovddáš lei gávdnan sudnuide.

Isit suhtai go fuomášii ahte eamit lei áigon váldit mielde krystálladávviriid mat ledje leamašan su eatnis ovdal.

Son muitalii ahte son vieččai iežas bealleautomáhtalaš hávlára maŋŋel go lei diggon eamidiin.

 

Dubmehalai máksit

Son lea mieđihan ahte lea goddán eamida ja biebmobártni, muhto ii loga muitit movt luođat manne.

Dievdu roasmmohuvai garrasit ieš maid go geigii bissu iežas guvlui seamma eahkeda.

59-jahkásaš lea dubmehallan máksit 200 000 ruvnno guovtti fuolkái, ja 100 000 ruvnno goddon nissona eadnái, dieđiha NRK.

På forsiden nå