Sámedikki dievasčoahkkin jienasteapmi. Govven: Sámediggi

Dorjot duohta­vuođa- ja soabadeami­kommi­šuvnna

Okta bellodat lei dušše guhte ii lean mielas ásahit kommišuvnna, muđuid lei Sámedikki dievasčoahkkimis ovttajienalaš ovttaoaivilvuohta doarjut ásahit duohtavuođakommišuvnna.

10:01 Geassemánu 02. beaivi 2017
Ođastuvvon: 02.06.2017 - 10:05

Buot Sámedikki bellodagat, earret go Ovddádusbellodat, dorjo árvalusa ásahit duohtavuođa ja soabadeame kommišuvnna, čállá Sámediggi preassadieđáhusastis.

Oanehaččat muitaluvvon de lea čállon áššemearrádusas ná:

– Sámediggi diehtá ahte Sámi álbmot lea gillán stáhtalaš dáruiduhttinpolitihkain, mii bisttii badjel čuođi jagi. Ollu sápmelaččat dovdet ain soardima dáruiduhttima geažil, sihke ovttaskas olmmožin ja maid servodahkan.

 

Proseassat
Sámediggi oaivvilda ahte seanadeapmi, eanet luohttevašvuohta ja oktavuođaid ođasmahttin gaskal sámi-, kvena- ja dážaálbmoga ferte čađahuvvot proseassaid bokte mat leat ásahuvvon doahttaleami, dohkkeheami, ja mieđiheami nala ja álbmotrievttalaš stándaurdiid mielde.

– Dohkkeheamis, mieđiheamis ja seanadeamis ii leat sáhka dušše sápmelaččaid ja dážaid gaskavuođain, kvenaid ja dážaid gaskavuođain, muhto seamma olu doahttaleami ja dohkkeheami birra ahte assimileren čuozai iešguđet ládje čállá Sámediggi.

 

Guorahallat máŋga buolvva
Sámediggi bivdá Stuoradikki doarjut evttohusa ásahit kommišuvnna sámi ja kvena álbmogii Norggas.

Sámediggi oaivvilda ahte kommišuvdna mii guorahallá diliid ollu buolvvain maŋás guvlui, boahtá leat eastadeaddjin boahtteáiggi boasttuvuođaide ja duolbmamiidda unnitloguálbmogiin.

– Stáhta ii leat vel loahpalaččat čielggadan sámiid dáruiduhttima sápmelaččain ja kvenain, ja dat lea dehálaš eanet ipmárdusa háhkamii ja gierdevašvuhtii majoritehtaservodagas, čállá Sámediggi.

 

På forsiden nå