Cuoŋománus gávdnui bombalágan ávnnas Oslos, ja politiijat válde gitta 17-jahksáčča geas lei bávkkanas. Govven: Lise Åserud / NTB scanpix

Ballet su viggat geardduhit bomba­plánaid Oslos

Diggegoddi guhkidii 17-jahkásačča giddagasáiggi guvttiin vahkkuin.

10:23 Geassemánu 19. beaivi 2017
Ođastuvvon: 19.06.2017 - 10:26

Oslo diggegoddi mearridii guhkidit giddagasáiggi suoidnemánnu 3. beaivái, go ballet ahte sáhttá čiehkat duođaštusaid ja ahte sáhttá geardduhit barggu man dihte su leat váldán gitta.

 

Ii mieđit sivalažžan

Cuoŋománu 8. beaivvi giddejedje stuora oasi Grønlánddas Oslos go gávdne bombalágan diŋgga Vaterland šalddi lahkosis.

Diŋga man gávdne duođaštuvvui leat bomba mii lei ráhkaduvvon lightergásain ja ruovdebinnáin, dieđiha Politiijaid Sihkarvuođabálvalus (PST). Diggi oaivvilda ahte son lei áigon geavahit bomba terrordaguide.

Bártni bealušteaddji, advokáhtta Javeed H. Shah, muitala ahte 17-jahkásaš ii mieđa iežas sivalažžan.

 

Finnmárkkus orron

PST lea áššáskuhttán bártni go lea rihkkon ráŋggáštuslága paragráfa 142, goalmmát oasi, mii guoská lobiheames dahkamuš bávkkanasmateriálain.

Paragráfa lea kapihttalis mii guoská terrordaguide ja eará terrorguoskevaš daguide ráŋggáštuslágas.

Áššáskuhtton bárdni lea Ruošša stáhtaborgár Davvi-Kaukasusis eret. Son lea dorvoohcci ja bođii Norgii 2010:s bearraša mielde ja oaččui ássanlobi Norggas.

Son lea orron Finnmárkkus daid maŋemus jagiid.

(©NTB)

Fáddásánit
Ođđasat

På forsiden nå