Govven: Lise Åserud / SCANPIX. Čájáhusgovva

– Lea olmmoš­vuoigatvuođa rihkkun

Go dárogielagat buohccájit, de besset gulahallat dearvvašvuođabargiiguin geat hupmet dárogiela. Eanaš sámegielagiin ii leat vejolašvuohta hupmat eatnigiela dearvvašvuođabargiiguin go sii buohccájit. Ođđa iskosis čalmmustahtto sámiid giella- ja kulturdilálašvuohta.

16:03 Miessemánu 16. beaivi 2017
Ođastuvvon: 16.05.2017 - 16:33

Ođđa iskosis čájehuvvo ahte Norgga buohccidivššáriidda ii oahpahuvvo doarvái bures movt galgá gulahallat sámi buhcciiguin. Iskosis leat geahččan oahpahusaid fágaplána, mas fokuserejit sámi kultuvrra, dearvvašvuođaipmárdusa, ja buozalmasvuođa lahkoneami, čállá UiT neahttasiiddus.

 

– Rihkku olmmošvuoigatvuođa

Eanaš sámit hupmet dárogiela njuovžilit, muhto go eallin šaddá lossat ja váttis buozalmasvuođa dihte, de šaddá dárbu gulahallat dainna gielain maid dovdá buoremusat.

– Nu guhká go leat eamiálbmogat Norggas, de galggaleimmet sin rivttiid nannet ja ovdamearkka dihte fállat dulkka, lohká Liss Trine Eriksen, gii lea okta čálliin dan iskosis.

Eamiálbmogiin lea riekti beassat hupmat eatnigielaset Norggas.

– Lea olmmošvuoigatvuođa rihkkun, čuoččuha nubbi čálli, Berit Andersdatter Bongo.

 

Addit sámi perspektiivva

Ii leat dušše sámegiela birra sáhka go deaivvada sámi buhcciin, muhto leat maid kultuvrralaš ipmárdusa birra sáhka.

Boađus iskosis lea ahte fágaplánas norgga buohccidivššároahpahusas váilo eamiálbmotperspektiiva.

– 1950 logu dáruiduhttin čuozai garrasit sámiide. Odne leat olbmot eanet sáhkkidat, guđe báikki olmmoš lea ja gii lea. Sávvamis dat addá rievttes čalmmustahttima movt lea leat sápmelažžan ja buktá sámi perspektiivvaid buot almmolaš bálvalusaide boahtteáiggis, oaivvilda Liss Trine Eriksen.

 

Almmuhuvvo boahtte mánu

– Mii fertet buohccidivššároahpahusa bealis šaddat čeahpibut čalmmustahttit sámi osiid, ja sihkarastit daid go ráhkadit ođđa fágaplánaid Ahkkánjárggain ja Hársttáin, lohká dearvvašvuođaoahpahusa oahpahusjođiheaddji Marta Grongstad.

Vuollel bealli oahpahusbáikkiin sámi guovlluin, ledje girjjit sámi kultuvrra birra.

25 oahpahusbáikki leat leamaš mielde dan iskkadeamis mii almmuhuvvo riikkaidgaskasaš eamiálbmotkonferánssas «Indigenous Voices in Social Work» Álttás geassemánus.

På forsiden nå