SOMÁ VUOITIT: Vaikko Roy Arthur Olsen lea vuoitán olu maŋemus jagiid, de lea su mielas dat hui somá juohke háve. Vuorkágovva.

Faskii njeallje golli vahkko­loahpas

Mannan vahkkoloahpa báhčingilvvuide serve čieža Guovdageainnu báhčči. Okta sis lei Roy Arthur Olsen, gii ii váldán unnit go ­njeallje golli mielde ruoktot.

10:57 Miessemánu 30. beaivi 2017

Guovdageaidnulaš ja báhčči Roy Arthur Olsen lei okta čieža Guovdageainnu báhččis gii searvvai fylkkameašttirgilvvuide mannan vahkkoloahpa Kvenvikmoenis Álttás.

Meahccebáhčin, ovcci buoremusa

1. Roy Arthur Olsen, Kautokeino SSK
2. Adam Klemet Hætta, Kautokeino SSK
3. Arnulf Losvar, Talvik JFF
4. Liv Eli Holmestrand, Kautokeino SSK
5. Bjørn Malin, Kautokeino SSK
6. Klemet Ole Hætta, Kautokeino SSK
7. Nathalie Jeanett Losvar, Talvik JFF
8. Harald Mikkelsen, Talvik JFF
9. Ole Johan Olsen, Talvik JFF

Doppe son šattai fylkkameašttirin.

– Lea dieđus hui somá vuoitit. Lean vuoitán olu maŋemus jagiid, nu ahte ledjen okta favorihtain, dadjá son.

Gilvvus lei sihke meahccebáhčin ja johtti ealga maid báhče. Meahccebáhčimis geavahit báhččit bivdobissu, ja báhčet báhčosiid main leat elliid govat.

Juohke luođain sáhttá oažžut juogo vihtta, golbma dahje nulla čuoggá.

 

Unnán áigi hárjehallamii

Dál go Olsenis lea unna bártnáš masa eanas áigi manná, de báhcá unnán áigi hárjehallamii.

– In leat šaddan dette hárjehallat. Guovtte - golmma geardde leat hárjehallan ovdal gilvvuid. Mánná olu áigi, ja dat dagaha unnit áiggi hárjehallamii, dadjá son.

 

30 báhčči

Fylkkameašttirgilvvuide, maid Talvik JFF lágidii, serve 30 báhčči, čiežas sis guovdageaidnulaččat.

Guovdageaidnulaččaid gaskka lei garra gilvu, ja eatnasat ledje logi buoremusa searvvis goappašat gilvvus.

Nissonbáhčči Liv Eli Holmestrand lei measta birgemeahttun, ja attii garra gilvvu Olsenii, go faskii 150 čuoggá oktiibuot meahccebáhčimis.

– Liv Eli bážii máilmmi bures, ja lei guhká birgemeahttun. Oažžut 150 čuoggá ii geava beare dávjá, nu ahte lei hui bures dahkkon, čilge Olsen.
Olsen aŋkke vuittii meahccebáhčima, ovttain čuoggáin eambbo go Adam Klemet Hætta, gii bođii nubbin. Liv Eli bođii njealjádin.

 

Loga maid: Vuoitá ahte vuoitá

 

Johtti ealga, ovcci buoremusa

1. Roy Arthur Olsen, Kautokeino SSK
2. Adam Klemet Hætta, Kautokeino SSK
3. Arnulf Losvar, Talvik JFF
4. Bjørn Malin, Kautokeino SSK
5. Nils Aslak Triumf, Kautokeino SSK
6. Klemet Ole Hætta, Kautokeino SSK
7. Liv Eli Holmestrand, Kautokeino SSK
8. Ole Johan Olsen, Talvik JFF
9. Harald Mikkelsen, Talvik JFF

Boahtte vuoitin mihttu

Borgemánus lágiduvvo Davvi-Norgga meašttirgilvu Álttás, mii lea Olsena boahtte vuoitinmihttu.

– Dá lea gilvu masa searvvan juohke jagi, ja lean maŋemus njeallje jagi šaddan Davvi-Norgga meašttirin. Dat mihttu lea dieđusge dán jagi maid, dadjá son.

Báhčán 23 jagi

Olsen lea hárjánan báhčči, ii ge leat báhčán unnit go 23 jagi.

– In riekta dieđe manne dat lea nu somá mu mielas. Báhčin lea veahá hástaleaddji, ja dat soaitá dagahit dan suohtasin, loahpaha son.

Fáddásánit
Valáštallan

På forsiden nå