Sámediggeráđđi Inger Eline Eriksen áigu buoridit duoji gánnihahttivuođa ja álkidit ráhkadanávdnasiid viežžama. Govvamontáša. Duogášgova govven: Nils Johan Vars. Portreahttagovva: Åse Pulk / Sámediggi.

Oaivvilda duojáriid galgat beassat meahcis vuodjit nie mo boazo­doallit

Sámediggi almmuha dál sierra dieđáhusa duoji birra, das árvalit earret eará mohtorjohtalustlága rievdadit.

14:56 Miessemánu 09. beaivi 2017
Ođastuvvon: 09.05.2017 - 15:05

Dál addá Sámediggi sierra dieđáhusa duoji birra vuosttaš gearddi. Dat dáhpáhuvvá Sámedikki dievasčoahkkimis miessemánu 31. beaivvi.

 

– Mohtorjohtalusláhka ferte rievdaduvvot

Eanet duojárat leat sorjavaččat luonddu ráhkadanávdnasiid geavaheamis. 

Hástalussan lea dat go sis ii leat lága bokte vuoigatvuohta vuodjit meahcis viežžamin ráhkadanávdnasiid, muhto leat sorjavaččat sierra lobi oažžumis mohtorjohtalusgildosis.

Dát geavahus buktá lassi barggu duojáriidda, iige dat dávis sámi jurddašanmállii, čállá Sámediggi preassadieđáhusas. 

– Čielggas lea ahte berrešii leat vuoigatvuohta vuodjit meahcis ealáhusa oktavuođas. Mohtorjohtaluslága ferte rievdadit vai duojárat šattašedje dássálaga eará ealáhusbargiiguin geain lea vuoigatvuohta vuodjit, dadjá Eriksen Fjellgren preassadieđáhusas.

 

Buoridit gánnihahttivuođa

Duodji lea kulturguoddi ealáhus mas lea stuorra mearkkašupmi sámi gillii, kultuvrii ja ealáhusovddideapmái.

Danne lea deaŧalaš sihkkarastit ahte duodji birge sihke kultuvrralaččat ja ealáhussan. Duojis lea stuorra mearkkašupmi sámi identitehtii, čállá Sámediggi.

– Sámedikkis lea mihttomearrin ovddidit duoji ealáhussan, nu ahte eambbogat sáhttet viežžat das birgejumi, dadjá sámediggeráđđi Inger Eline Eriksen Fjellgren.

Eriksen Fjellgren čilge ahte iežas duddjon duoji eanet vuovdin stuorát márkanii lea guovddážis Sámedikki áŋgiruššamis.

Dát mearkkaša maiddái dan ahte profešonalitehta, sisaboađu ja gánnáhahttivuođa ealáhusas ferte buoridit.

 

Ferte árvvoštallat eará doarjjaortnegiid

Sámediggi lea 2017:s várren duodjái oktiibuot 14 miljon ruvnno.

Vaikko duojárat leat ožžon doaibmadoarjaga, de ii leat dat dattetge buvttihan stuorát gávpejođu.

Duodjeealáhusa logut čájehit ahte gaskamearálaš duojár lea sorjavaš doaibmadoarjagis vai doaimma sáhttá jođihit marginála badjelbáhcagiin.

– Go Sámedikki váikkuhangaskaoapmeortnet ii doaimma, de lea mis politihkkariin ovddasvástádus heivehit dahje rievdadit doarjjaortnega vai juksat dan beaktilvuođa maid háliidat. Mii oaivvildat ahte eará doarjjaortnegat leat eanet ulbmillaččat duodjeealáhusa nannemii, nu go ovdamearkka dihtii bargostipeanda, dadjá sámediggeráđđi Inger Eline Eriksen Fjellgren.

Fáddásánit
Ođđasat

På forsiden nå