GUOVSSAHAS GEASUHA: Guovssahas lea dakkár vásáhus maid turistat háliidit vásihit juobe oktii eallinagis. Davvi-Norga lea guovlu gos dan álkit beassá vásihit. Čájáhusgovva. Govven: Heiko Junge / NTB scanpix

Kiinnálaččat ráhkistit Davvi-Norgga

Kiinnálaš turistat leat fuobmán dáid guovlluid ja lea šaddame beakkán luopmobáikin. Moatti mánus leat kiinnálaš turisttaid idjadeamit lassánan čieža duháhis 17000ii.

10:47 Miessemánu 13. beaivi 2017
Ođastuvvon: 13.05.2017 - 10:55

Idjadanlogut hoteallain njidjet lulli-Norggas, muhto davvi-Norggas baicce lassána hirbmosit. Golmma maŋemus mánuid leat kiinnálaš turistat fuomášan davvi-Norgga, ja lea ge guovssahas mii eanemusat geasuha boahtit davvi-Norgga galledit. Njukčamánus ledje Norggas 1,8 milliuvnna idjadeami hoteallain. Davvi-Norgga hoteallain idjadedje badjel 281 000 olbmo njukčamánus, mii lea 48 000 eanet idjadeamit go diibmá seamma mánu.

 

– Čáppa davvi-Norga

Mátkkošteamiministtar Monica Mæland mielas lea buorre go guovssahasturismmain nu bures manna.

– Golmma jagi badjel leat idjadeamit Davvi-Norggas lassánan hui ollu. Dat lea hui buorre. Čáppa Davvi-Norga geasuha olgoriikkaturisttaid. Ollugiidda lea guovssahas dat stuora vásáhus maid ferte vásihit oktii eallimis, muitala son NTBii. 

 

Sámi mátkeealáhus 2.0 

Sámedikkis lea maid ovttasbargoprošeakta NordNorsk Reiseliv:ain, golmma davimus fylkkain ja Innovašuvdna Norggain, nannet sámi mátkeealáhusfitnodagaid, ja Sámediggeráđđi Mariann Wollmann Magga doaivu ahte prošeakta nanne sámi mátkeealáhusáŋgiruššama.

– Mun oaivvildan ahte ovttasbargu sámi mátkeealáhusaktevrraid gaskka lea áibbas deaŧalaš jos sámi mátkeealáhusaiguin galggaš lihkostuvvat. NordNorsk Reiseliv fitnodagas lea erenoamáš gelbbolašvuohta davviguovllu mátkeealáhusaiguin ja dát ovttas sámi gelbbolašvuođain stivrenjoavkkus ja sámi mátkeealáhusfitnodagain, addá buriid bohtosiid, oaivvilda Magga.

Sámi mátkeealáhus 2.0 lea golmma jagáš prošeakta man NordNorsk Reiseliv jođiha.

På forsiden nå