Internašunála Boazodoalloguovddáš (ICR) direktevra ja girjji ovddasvástideaddji Anders Oskal čájeha girjji masa nuorat árktalaš guovlluin leat searvan čállosiiguin ja govaiguin. Govven: Anne Gro Gaup

Čohkken 14 eami­álbmoga biepmuid ovtta girjái

EALLU girjái leat čohkken 30 biebmoneavvaga 14 álgoálbmotjoavkku biebmokultuvrras árktalaš guovlluin gos lea boazodoallu eallinvuohkin

15:35 Miessemánu 03. beaivi 2017
Ođastuvvon: 03.05.2017 - 15:42

Girjealmmuheapmi lea Fairbanksas Alaskas, miessemánu 10.-11.beivviid, Árktalaš Ráđi ministtarčoahkkimis.

Maŋemus guhtta mánu lea Internašunála Boazodoalloguovddáš (ICR) doama-doama bargan gárvet girjji, maid besset geiget Árktalaš Ministtarráđđái miessemánus.

 

Borramušávdnasat mearas ja gáttis

EALLU prošeavtta neavagirjjis leat badjelaš 160 siiddu mas leat sihke govat ja čállosat mat leat čohkkejuvvon 14 álgoálbmotguovllus maŋemus guovtti jagis, ja leat 30 biebmoneavvaga girjjis mielde.

– Girjjis leat 55 čálli 14 iešguđet eamiálbmotguovlluin. Vuosttaš deaddeleapmi lea vuos 200 girjji, maid Árktalaš ministtarráđđi galgá oažžut, go leat diŋgon mis dán prošeavtta čađahit, muitala ICR direktevra Anders Oskal. 

 

Nuorat geat leat čállán girjji

Movt ráhkada árbevirolaš biepmu ja movt ráhkkana, konservere ja gohkke árktalaš álbmoga biepmuid, leat oasit mas gávnnat vástádusaid girjjis.

Ollu neavvagiin geavahuvvo bohcco- ja cariboubiergu, muhto leat maid mearanjiččehas, šattuin sihke mearas ja eatnamis biebmoneavvagat girjjis, čállá Internašunála Boazodoalu guovddáš Facebookas.

– Girji lea oasáš EALLU prošeavttas, ja leat nuorat geat leat čállán ja govven kapihttaliid girjái, muitala Oskal. 

 


Guvges ivnnát varramárffit. Govven: Anne Gro Gaup
 

Áigot deaddelit eanet girjjiid

Almmuheamis šaddá paneladigaštallan man UAF Bohcco dutkanprográmma ovttas Internašunála Boazodoalu guovddážiin lágida.

Fáttát leat biebmomáhttu, nuorat ja movt buoremusat geavahit biepmu ja árbevirolaš máhtu servvodagas.

– Mis lea plána deaddelit eanet girjjiid, muhto eat leat jurddašan ahte galgat dinet dainna. Prošeakta joatká ain guovtti jagi badjel ovdal go nohka bargu, muitala Oskal gii ii dieđe galgá go girji vuvdot.

 

EALLU prošeavtta lea Internašunála Boazodoalloguovddáš (ICR) ovttas World Reindeer Herders (WRH) čađahan, ja lea vuolgán EALÁT dutkanprošeavttas.

På forsiden nå