Ii lean konsešuvdnageatnegasvuohta čájehit pasieantafilmmaid oahpahusas. Čájáhusgovva. Govven: Terje Bendiksby / SCANPIX

Čájehedje filmmaid pasieanttain doaktára luhtte

UiT Norgga árktalaš universitehta lea oahpahusas čájehan filmmaid pasieanttain, eai ge leat sihkarastán filmmaid doarvái bures dahje ohcan lobi čájehit filmmaid.

11:59 Miessemánu 13. beaivi 2017
Ođastuvvon: 13.05.2017 - 12:04

Dattege eai galgga hearkkes dieđuid ribahan almmolašvuhtii, čállá Norgga árktalaš universitehta sin neahttasiiddus.

 

Šállošit go eai lean dárkilat

Sihke medisiidna profešuvdnaoahpahus ja vihtta eará UiT dearvvašvuođaoahpahusa leat čađahan videooahpahusa masa dárbbašuvvo konsešuvdna. Skábmamánus fuomášuvvui ahte UiTs ii lean konsešuvdna, ja boasttuvuohta dieđihuvvui databearráigehččui (Datatilsynet).

– Mii leat dárkilat go lea sáhka háhkat dárbbašlaš konsešuvnnaid dutkamis, muhto dađi bahát eat leat seamma dárkilat leamaš oahpahusa ektui. Dan mii šállošit, muitala UiT medisiinna ja odontologiija prodekána Inger Njølstad.

 

Filbmen pasieanttaid doaktára luhtte

Oahppit leat maid ieža filbmen ja vurken filmmaid vuorkábálvalusaide neahtas. Badjel 4000 filmma leat dahkkon pasieanttain ja dakkáriin geat nektet leat pasieantan. Filmmat leat dađistaga sihkkojuvvon eret, ii ge gávdno nammalistu sis geat ledje mielde filmmain. Dainna lágiin ii sáhte UiT dieđihit sidjiide geat serve filmmaide.

– Mii šállošat dáhpáhusa, erenoamážiid sii geat leat suovvan iežaset doavtterdiimmu filbmejuvvot, vai min oahppit galget oažžut buoret oahpahusa, muitala Njølstad.

 

Ohcan lobi dál

Riska ahte hearkkes dieđut leat lahppon, ii leat stuoris, čuoččuha UiT neahttasiiddus. Buot oahppit leat ožžon dieđuid movt sii sihkkot dáid dieđuid ekstearna báikkiin.

UiT lea ohcan databearráigeahčus lobi geavahit dáid filmmaid oahpahusas čavčča rájes.

Fáddásánit
Ođđasat

På forsiden nå