Automáhtabissut maid bukte njukčamánus. Govva: Finnmárkku politiijat.

Olbmot buktet bissuid politiijaide dál

Finnmárkku politiijat leat ožžon buori muddui bissuid dál go lea vearjoamnestiija mii álggahuvvui njukčamánu 1. beaivvi. Vearjoamnestiija bistá miessemánu 31. beaivvi rádjái.

09:03 Cuoŋománu 11. beaivi 2017

Oktiibuot leat 25 hávlára, guokte automáhtabissu, guokte luođđabissu, ovtta pistovla ja ovtta niibbi buktán politiijaide. Hávlárat leat maid registrerejuvvon maid eaiggát oažžu váldit fas ruoktot.

 

Fállet museaide

Automáhtabissut maid bukte Girkonjárgga politiijastašuvdnii leat nuppi máilmmisoađi rájes.

– Ledje guokte automáhtabissu maid ledje fiidnát vurkkodan. Boasttu gieđaid gaskkas lei sáhttit bahut roasmmohuhttit earáid. Vearjjuin lea historjjálaš árvu ja Várjjat Musea / Rádjemusea lea ožžon fálaldaga vurket dáid vearjjuid jus leat plomberejuvvon. Dat bissut eai biddjo billisteapmái, muitala Girkonjárgga politiijastašuvnna hoavda Hans Møllebakken.

 

Eai leat ožžon nu ollu vearjjuid

Mátta-Várjjagis leat eanemus vearjjuid buktán dan vuosttaš mánu. Doppe bukte 11 vearjju. Susanne Kristiansen, geas lea vearjoovddasvástádus Finnmárkku politiijaguovllus, sávvá ahte vel eambbogat buktet vearjjuid sidjiide go lea vearjoamnestiija.

– Ovddit amnestiijas ožžo maid ollu bissuid ja vearjjuid, muhto dán vuoru eai leat seamma ollu vearjjut boahtán midjiide. Sáhttá leat ahte oaččuimet nu ollu vearjjuid ovddit háve, dahje ahte olbmot eai leat gullan ahte lea vearjoamnestiija jođus, muitala Kristiansen.

 

Eai gažat olbmuid

Son muittuha ahte sáhtát namatkeahttá buktit vearjjuid nu ahte ii registrerejuvvo iežat namma. Čuggestatniibbit maid gullet amnestiijii.

– Ollugat eai jurddaš ahte dat vearju mii sis lea gealláris dahje áittis lea lobiheames vearju. Ii leat lohpi eaiggáduššat bissuid mat eai leat registrerejuvvon, ja vearjoamnestiija addá olbmuide vejolašvuođa registreret vearjjuid gažadeami haga. Lea maid vejolaš buktit vearjjuid politiijaide, lohká vearjoovddasvástideaddji.

 

Sáhtát šaddat čohkkát

Jus gávnnahalat ahte dus lea bissu mii ii leat registrerejuvvon, de sáhtát šaddat guokte jagi giddagassii.

Hávlárat mat eai leat registrerejuvvon ja dus leat leamaš ovdal golggotmánu 1990 rájes, lea lohpi eaiggáduššat, muhto politiijat ávžžuhit buohkaid registreret vearjjuid.

Muittuhussan vel loahpas: vearjjut mat leat báhcán vádjolan bearášolbmuid maŋis, berre maid registreret dahje sirdit ođđa eaiggádii, muitala Kristiansen.

Vearjoamnestiija bistá miessemánu 31. beaivvi rádjái.

Fáddásánit
Ođđasat

På forsiden nå