Trine Noodt lohká váttisvuohtan go sámegielat mánát šaddet leat dárogielat mánáidgárddiin go eai vuorut mánáidgárddiid gos lea sámegiella. Govven: Marit Elin Kemi.

– Mánáin galgá leat riekti beassat sámegiel mánáid­gárdái

Finnmárkku gurutbellodat lea riikkačoahkkimis ožžon dohkkehuvvot ahte buot mánáin galgá riekti leat sámegielat mánáidgárddiin.

16:40 Cuoŋománu 04. beaivi 2017
Ođastuvvon: 13.06.2017 - 12:03

– Mii oaidnit váttisvuođa ovdamearkka dihte Álttás gos sámi mánát šaddet leat dárogielat mánáidgárddiin go suohkan ii vuorut ásahit sámegielat mánáidgárddiid. Dan áigut mii vuoruhit ovddemussii, ja gurutbellodaga prográmmas namuhuvvo ahte sámegiela galgá leat riekti oažžut. Dat lea lávki rievttes guvlui, muitala Trine Noodt.

 

Guorahallat maid ruovdemáđi huksema

Gurutbellodat áigu vuoruhit sámegiela ja kultuvrra boahtte válgaáigodaga.

Muhtin eará áššit maid gurutbellodat vuoruha lea teáhtervistti Beaivváš Sámi Našunála Teáhterii, bisuhit guollebuktingeatnegasvuođa, bataljuvdna Porsáŋgui, guorahallat ruovdemáŋi Roavvenjárgga ja Girkonjárgga gaskkas ja ođđa rádjestašuvnna Storskogii.

På forsiden nå