Ávvira vuorkágovva.

Nordlys vuittii

Ikte álge dán jagáš ráidočiekčamat. Porsáŋgu čievččai IL Nordlys vuostá ruovttušiljus, gos Nordlys vuittii.

11:11 Cuoŋománu 23. beaivi 2017
Ođastuvvon: 24.04.2017 - 09:53

Lávvardaga čievččastii Porsáŋgu ja IL Nordlys fas johtui 2017:i 4. divišuvnna ráidočiekčamiid.

Ollu geahččit ledje boahtán čiekčamiidda ja eanaš ledje IL Nordlys fánssat.

– Viimmat lea čiekčanáigodat fas álgán, ja Nordlys vuittii Porsáŋggu vuostá Leavnnjas 2-3, čállá duđavaš Nordlys spábbačiekčanjođiheaddji Geir Michael Boine iežas Facebooksiiddus.

 

Ođđa čiekčit bures birgen

IL Nordlys lea maŋimuš áigge ožžon ollu ođđa čikčiid geat leat čállán šiehtadusa Nordlys spábbačiekčanjoavkkuin.

– Ođđa Nordlys spábbačiekčanjoavkku čiekčit Mads Petter Utsi ja Frank Ole Vars čievččaiga bures ja nuorra moallavákta, 15 jahkásaš Jonas Myrskog Balto čuoččui nannosit moala ovddas, čállá spábbačikčiidjođiheaddji Geir Michael Boine.

Moallačiekčit leigga Tom-Erik Biti, gii čievččastii 2 moala ja ovtta fas Jon Andreas Rognerud Eira.

 

Eará 4. divišuvnna čiekčamat

Eará 4. divišuvnna čiekčamat mat ledje lávvardaga:

Kirkonjárga čievččai Bossogohpi vuostá ja vuittii 2-0.

Guovžajávri čievččai Norild vuostá 1-0.

 

Boahtte čiekčamat leat boahttelávvardaga 29.4., dalle leat vihtta čiekčama. 

Lávželuokta čiekčá Guovdageainnu vuostá, Guovžajávri Porsáŋggu vuostá, Sørøy Glimt Norild vuostá, Fállejohka Hámmárfeasta vuostá ja Nordlysas lea ruovttučiekčamat Honnesvági vuostá.

Fáddásánit
Valáštallan

På forsiden nå