Don it leat áidna gii leat jođus beassážiid, ja gaskavahku fertet gozuid alde leat. Govven: Nils Johan Vars

Gaskavahku beaškkehit eanemus biillat oktii johtolagas

– Buot statistihkat čájehit ahte stuorámus lihkohisvuođabeaivi beassážiid lea gaskavahkku, lohká  Frende dáhkádusfitnodaga fágahoavda Roger Ytre-Hauge.

12:09 Cuoŋománu 10. beaivi 2017
Ođastuvvon: 10.04.2017 - 12:09

Miehtá beassášvahkku lea ollu johtolat luottain, muhto gaskavahku lassána johtolat dan dihte go lea beallebargobeaivi.

– Diibmá dieđihuvvojedje 784 smávva ja stuora lihkohisvuođa dáhkádusfitnodagaide gaskavahku beassášvahkus, ja 13 olbmo roasmmohuvve dán beaivvi, muitala Frende Forsikring fágahoavda Roger Ytre-Hauge.

 

68 olbmo roasmmohuvvo

Ollislaččat beaškkehedje 688 biilla gaskamearálaččat juohke beaivvi beassážiid, ja 68 olbmo roasmmohuvve johtolagas beassášvahku.

Bearjadagaid lea dábáleamos beaivi go lihkohisvuođat leat, muhto guhkesbearjadat lea earálágan. Lea dábálaš ahte bassebeivviid eai leat nu gallis johtolagas.

 

Muittuhusat movt páhkket

Lea njalkkas go lea bivvalis dálki ja muohta luottaid alde.

– Lea beare maŋŋit unnidit leahtu go leat geavvan badjel luotta. Fertet muitit ahte goahcanguhkodat lea guhkit go lea njalkkas. Vuoje dálkki ektui ja várut leahtu, rávve fágahoavda ja muittuha páhkket biergasiid rievttes ládje biillas.

– Lea várra ahte diŋggat bohtet girddi jus šattat garrasit goazastit dahje jus beaškkehat nuppiin biillain, lohká son. Jus šattat goazastit 50 km/dii, de sáhttá 20 kilosaš seahkka girddihit ja deaddit 1,25 tonna go deaivá du.

– Cokka losimus biergasiid vuolemussii, stuolu maŋábeallái, ja ale divtte diŋggaid leat luovos biillas, lea mu ráva, lohká Ytre-Hauge.

Fáddásánit
Ođđasat

På forsiden nå