Bargiidbellodaga riikačoahkkináirras, Davvi-Trøndelága ovddasteaddji Inger Marit Eira-Åhren deattuhii boraspirepolitihka sárdnestuolus. Govva: Bargiidbellodaga njuolggosáddaga šearbmagovva.

– Luondu šaddan stoahkan­šilljun biologaide ja luonddu­gáhtte­jeddjiide

– Boraspiriin lea stuorát árvu go min bohccuin ja ránnjá sávzzain ja lábbáin, lohká Inger Marit Eira-Åhren.

14:40 Cuoŋománu 21. beaivi 2017
Ođastuvvon: 21.04.2017 - 15:28

Duorastaga álggii Norgga Bargiidbellodagas riikačoahkkin Oslos, ja sárdnestuolus celkkii Davvi-Trøndelága riikkačoahkkináirras Inger Marit Eira-Åhren dálá boraspirehálddašeami birra.

– Boraspirehálddašeapmi lea šaddan stoahkanšilljun biologaide ja luonddugáhttejeddjiide. Boraspiremáhttu lea dušše dutkama vuođul, ii ge ealáhusa gelbbolašvuođa vuođul. Ealáhusa olbmuide eai jáhke, vaikko sii ellet dáinna 365 beaivvi jagis, lohká Eira-Åhren.

 

Satellihttagovain gehččet

Bargiidbellodatáirras Eira-Åhren čuoččuha ovdamearkka go gehččet satellihttagovain man ollu muohta lea duoddaris giđđat vai gávnnahit siva manne boazojápmin lea.

– Mii gávdnat jápmán bohccuid giđđat, bievllain, meahcis, gaikkoduvvon ja borahallan albasii, geatkái ja guvžii. Eatnasiidda leat boraspiret dušše logut báhpiriin, muhto midjiide, geat beaivválaččat vásihit boraspirevahága ja massima, leat čoavjjehat ja vearditmeahttun heakkat mat borahallojuvvojit eallinaga, lohká son.

Eira-Åhren lohká maid dálá stáda hálddašeddjiid diehtit makkár váikkuhusaid boraspiret dagahit.

– Galgá leat mihttu ahte guohtuneatnamat ja meahcceresurssat buoremusat hálddašuvvojit ealáhusaid, olbmuid ja boahtteáiggi ovddas, loahpahii son sárdnestuolus.

Fáddásánit
Ođđasat

På forsiden nå