ÁLGGAHAN PROŠEAVTTA: Kárásjoga gieldda fástadoavttir, Amund Peder Teigmo, lea álggahan prošeavtta mainna pasieanttat álkibut galget oažžut dulkka jus dan dárbbašit. Priváhta govva

Álggahan prošeavtta mainna sáme­gielagat galget álkibut oažžut dulkka

– Buot dehálamos han lea ahte pasieanta ja doavttir áddeba goabbat guoibmáseaskka, oaivvilda Teigmo. Danne lea álggahan prošeavtta man mielde buohcciviesut galget automáhtalaččat oažžut dieđu jus dárbbašuvvo sámegiel dulka.

14:32 Cuoŋománu 04. beaivi 2017
Ođastuvvon: 04.04.2017 - 15:50

Olmmoš galgá beassat sámástit spesialistadearvvašvuođabálvalusain.

– Áidna maid fertet dahkat lea dieđihit dán birra iežat fástadoaktárii, nu ahte dat čállo du journálii, čállá Kárášjoga gieldda fástadoavttir Amund Peder Teigmo preassadieđáhusastis.

 

– Dehálaš ahte áddehallaba

Jus fertet spesialistta dikšui, de dát diehtu automáhtalaččat čuovvu čujuhusa go diibmu várrejuvvo.

Buohcciviesus galget lohkat dán diŋgojumi ja lágidit dulkka doaktárii nu ahte son ádde maid logat sámegillii.

Buot dehálamos han lea ahte pasieanta ja doavttir áddeba goabbat guoibmáseaskka, oaivvilda Teigmo.

– Pasieanttain leat iešguđet individuella dárbbut, sihke giela ja kultuvrra dáfus, lohká Teigmo, guhte lea álggahan prošeavtta «Kulturgiellapasieanttat».

 

Galgá álkidahttit

Lea dehálaš ahte buot doaktárat ovddidit dárbbu seamma ládje ovdalii go iešguđet ládje gielddas gildii.

– Ná áigut mii dahkat ahte spesialistadearvvašvuođabálvalus álkibut oaidná diŋgojumi, ja nu maiddái álkidat pasieantta dili, čállá Teigmo.

Son čállá ahte buohcciviesut gal áinnas háliidit fállat dulkkaid.

– Muhto dat han eai dieđe goas fertejit lágidit dulkka. Dan fertet mii sidjiide álkit muitalit, fálaldat gávdno, muhto dan ferte sihtat, čállá fástadoavttir.

 

Ovttasbarget vai buohkat dieđihit seamma ládje

Finnmárkku buohcciviessu lea álggahan sierra dulkonprošeavtta, dat dárbbašit diehtit goas lea dárbu dulkii.

Fástadoaktárat hui bures dovdet iežaset pasieanttaid, nu leat sis dát dieđut.

– Danne mii dál ovttasbargat ovddidit dán dárbbu buoremus lági mielde, nu ahte ii dárbbaš dán dárbbu registrerehit eará go oktii. Mihttu lea ahte pasieanta galgá oadjebasat diehtit ahte beassá hállat váibmogillii juohke háve go galleda spesialistta, čállá Teigmo.

 

Su ávžžuhus pasieanttaide ja oapmahaččaide geat sámástit ja geat háliidit dan muitalat buohccivissui lea čuovvovaččat:

– Sihkkarastte ahte du fástadoavttir čállá dán dieđu du journálii, cealká Teigmo.

Fáddásánit
Ođđasat

På forsiden nå