DOAIVVA: Vibeke Larsen lohká alddis leat čielga vuordámuššan ahte DNB čuovvola KLP ja geassáda ruhtadeaddjin DAPL prošeavttas. Vuorkágovva: Nils Johan Vars

Vuordá DNB maid geassádit oljorevre­prošeavttas

Sámediggepresideanta Vibeke Larsen lohká alddis leat čielga vuordámušaid DNB báŋkui, maŋŋil go odne beakkehii ahte KLP lea geassádan DAPL oljorevreprošeavttas.

15:25 Njukčamánu 13. beaivi 2017
Ođastuvvon: 14.03.2017 - 11:51

– Lea hui buorre ođas, lohke Larsen dasa go Kommunal Lansdpensjonskasse (KLP) lea odne almmuhan ahte eai investere fitnodagaide geain leat čanastumit Dakota Access Pipeline (DAPL) prošektii.

Larsen oaččui ge dán dieđu čoahkkimis KLP:in odne.

 

Fállán veahki

Sámediggepresideanta lohká Sámedikki fállan veahki KLP:i áššiin mat gusket álgoálbmogiidda.

– Mu mielas ledje árat jo galgat mearridit ahte geassádit prošeavttas. Danne leat ge fállan ahte sáhttit neavvut sin áššiin mat gusket álgoálbmogiidda boahtteáiggis, jus sis orro váilumin gealbu dákkár áššiin, lohká son.

Larsen lohká KLP:s leat stuorra servodatovddasvástádusa, go fállá earret eará penšuvdna- ja dáhkádusbálvalusaid Norggas, ja ahte sii berrejit čuovvut olmmoš- ja álgoálbmotvuoigatvuođaid sihke Norggas ja olgoriikkas.

– Lea lunddolaš ahte dat mii lea gustovaš dáppe ruovttus, galgá maid leat gustovaš olgoriikkas, lohká son.

 

Loga maid: KLP geassáda investoran DAPL fitnodagain

 

– Heahpat go DNB ain lea fárus

Eanaš dain stuorra davviriikkalaš finánsafitnodagain leat geassádan ruhtadeaddjit DAPL prošeavttas, go lea riska ahte dát prošeakta rihkku álgoálbmot- ja olmmošvuoigatvuođaid.

Njukčamánu 3. beaivvi celkki ON álgoálbmotáššiid erenoamášrapporterejeaddji Victoria Tauli-Corpuz ahte prošeakta rihkku dáid vuoigatvuođaid, go prošekterejeaddjit eai leat doarvái bures gulahallan daid álgoálbmogiiguin geaidda dát prošeakta čuohcá, ovdal go álggahedje bargguid.

Dan anii KLP oktan ággan dasa go dál geassádit.

Norgga bealde váilo dál vel ahte DNB ASA, mii lea Norgga stuorámus finánsakonseardna ja Oljofoanda geassádit prošeavttas, go olusat oaivvildit leat heivetmeahttumin ahte stáhtaeaiggáduvvon fitnodagat leat dás mielde.

– Mu mielas lea heahpat go dát eai leat vel geassádan, vaikke ON lea cealkán ahte DAPL čielgasit rihkku álgoálbmotvuoigatvuođaid, lohká Larsen.

 

Loga maid: Norgga ruhtadeaddjit árvvoštallet galget go geassádit oljorevreprošeavttas

 

Ballá šaddat dáhpin hilgut álgoálbmotvuoigatvuođaid

Odne lei Larsen ja Noereh! nuoraidorganisašuvdna galgat čoahkkinastit DNB:in, muhto konsearna bealis maŋidedje čoahkkima.

Larsen dattege lohká alddis leat doaivaga ahte DNB rievdada oainnu áššis.

– Go de oažžut ođđa čoahkkima singuin, de doaivvun oažžut buori ođđasa sin rolla dáfus DAPL-prošeavttas, lohká son.

– Mus lea vuordámuš ahte sii dovdet iežaset servodatovddasvástádusa. Dás lea sáhka das mo galgá meannudit álgoálbmogiid. Jus min fitnodagaide lea ortnegis hilgut álgoálbmotvuoigatvuođaid olgoriikkas, de sáhttá sidjiide šaddat dáhpin dan dahkat maiddái Norggas, lasiha sámediggepresideanta.

 

Bidjet deattu vai šaddet vástidit


LÁGIDEDJE MIELLAČÁJEHEAMI: Noereh jođiheaddji Dávvet Bruun-Solbakk lohká iežaset háliidan bidjat deattu DNB:ii vai šaddet vástidit DAPL birra.

Preassagovva: Noereh
 


Noereh sámenuoraidorganisašuvdna galggai maid odne čoahkkinastit DNB konsearnain, muhto go čoahkkin maŋiduvvui de lágidedje baicce miellačájeheami DNB váldokantuvrras Oslos.

– Dan dagaimet go eai oro nagodeamen dál vástidit dán ášši birra, mii háliideimmet bidjat veahá deattu vai šaddet vástidit, čilge Dávvet Bruun-Solbakk, guhte lea organisašuvnna jođiheaddji.

Bruun-Solbakk lohká iežaset organisašuvdnii leat dehálaš ahte dáža stáhtaoamastuvvon fitnodagat eai leat mielde dán dahje dán sullasaš prošeavttain boahtteáiggis.

– Mii gáibidat maid ahte álgoálbmotperspektiiva galgá boahtit oidnosii fitnodagaid ehtalaš njuolggadusain, lohká son.

Miellačájeheamis čohkkájedje nuorat DNB kantuvrras ja čájehedje dan njuolggosáddagiin sihke Facebook ja Instagram bokte, sii besse maid deaivvadit muhtin DNB ovddasteddjiiguin.

– Jáhkán leat hirbmat stuorra ávkki dákkár miellačájehemiin, DNB han lea ruđa massán go lea leamaš heajos beaggin sin rolla birra DAPL-prošeavttas, lohká Noereh jođiheaddji Dávvet Bruun-Solbakk.

Dien čuoččuhussii lea DNB gieskat vástidan NRK Sápmái, ja biehttalan iežaset vásihit ahte masset báŋkogeavaheddjiid DAPL-beaggima geažil.

 

Eai sáhttán boahtit

DNB gulahallan ráđđeaddi Ellen Dokk Holm dieđiha SMS bokte Ávvirii ahte čoahkkin masa sii ieža ledje bovden Sámedikki, lea maŋiduvvon.

– Fertiimet maŋidit go min sáttagoddái lei veadjetmeahttun čoahkkinastit odne, čálii son vuossárgga eahkedis.

 

 

 

 

 

 

På forsiden nå