VUITTII: Boazosápmelaš Jovsset Ánte Sara deaivvadii stáhtain Hålogalándda lágamánnerievttis gieskat. Vuorkágovva: Inga Marie Guttorm

Vuittii stáhta vuostá fas

Dál lea duopmu almmuhuvvon Jovsset Ánte Sara áššis, ja Sara vuittii fas stáhta vuostá, nu ii dárbbaš geahpedit 75 heggii.

11:08 Njukčamánu 17. beaivi 2017
Ođastuvvon: 17.03.2017 - 11:55

Nuorra boazosápmelaš Jovsset Ánte Sara deaivvadii stádain Hålogalándda Lágamánnerievttis, ođđajagemánus dán jagi.

Odne almmuhuvvui duopmu dán áššis.

 

Hilgot departemeantta guoddaleami

Lágamánneriekti gávnnahii ahte Eanandoallo- ja biebmodepartemeantta mearrádus man dahke njukčamánu 10. beaivvi 2014, mas gohččo Jovsset Ánte Sara geahpedit ealu 75 heggii njukčamánu 15. beaivvi rádjai 2015:s, ii leat gustovaš go mearrádus mielddisbuktá ahte rihkkot Sara vuoigatvuođa doaimmahit iežas kultuvrra nu mo SP artihkkal 27. cealká.

Nu lea lágamánneriekti hilgon departemeantta guoddaleami ja čuovvolan Sis-Finnmárkku diggegotti.

 

Eai árvvoštallan EMK P1-1

Lágamánneriekti galggai árvvoštallat leago Eanandoallo- ja biebmodepartemeantta mearrádus, mas gohččo Jovsset Ánte Sara geahpedit ealus gorrelogu mielde 75 heggii, gustovaš. 

Čuolbma lei ahte rihkku go dát mearrádus dan kultursuodjalusa mii minoritehtain lea ON konvenšuvnna siviila ja politihkalaš vuoigatvuođaid hárrái(SP), 27. artihkkala mielde, ja rihkku go mearrádus oamastansuddjema mii olbmuin lea Eurohpalaš olmmošvuoigatvuođakonvenšuvnna vuosttaš lassiprotokolla 1. artihkkala mielde (EMK P1-1).

Go lágamánneriekti gávnnahii ahte stáhta mearrádus rihkku Jovsset Ánte Sara rievtti doaimmahit iežas kultuvrras, de čállet ahte ii leat dárbu dárkilit árvvoštallat rihkku go mearrádus maiddái su oamastanvuoigatvuođa mii sus lea EMK P1-1 mearrádusa mielde. 

– Dákkár árvvoštallan ii rievdat duomu bohtosa, eai ge das leat eará vuoigatvuođalaš váikkuhusat go dat mat čuvvot lágamánnerievtti árvvoštallama SP 27. artihkkala hárrái, cealká duopmu.

 

Nuppes deaivvadii

Sara deaivvadii dál nuppes stáhtain diggevuogádagas, álgo háve meannuduvvui ášši Sis-Finnmárkku diggegottis, dalle vuittii Sara.

Sis-Finnmárkku diggegoddi fámohuhtii Eanandoallo- ja biepmodepartemeantta njukčamánu 10. beaivvi mearrádusa, mas gáibiduvvui Jovsset Ánte Sara siiddaoasis geahpidit boazologu.

Duomus daddjui ovttajienalaččat ahte 75:ain heakkain ii leat vejolaš birget boazodoalus, ja danne rihkku stáhta mearrádus riikkaidgaskasaš olmmošvuoigatvuođaid.

Stáhta guoddalii duomu, Hålogalándda lágamánneriektái.

 

Sara advokáhta Trond Biti lea hui duhtavaš bohtosiin.

 

 

 

 

 

 

 

På forsiden nå