ČILGII DIKKIS: Jovsset Ánte Sara eadni Ánne Márjá Siri, lea šaddan čilget iežas oainnu áššis goappašat diggevuoruin, dál sávvá duomu bissut. Vuorkágova: Inga Marie Guttorm

Sávvá duomu bissut

Jovsset Ánte Sara eadni sávvá Hålogalándda Lágamánnerievtti duomu bissut dál, muhto dattetge lohká illubeaivvi odne.

15:24 Njukčamánu 17. beaivi 2017

Jovsset Ánte Sara eadni Ánne Márjá Siri lea sihke Sis-Finnmárkku diggegottis ja Hålogalándda Lágamánnerievttis addán čilgehusa, ja su mielas lei illubeaivi bearjadaga go Lágamánneriekti hilggui stáhta guoddaleami.

– Sávan duomu bissut dál. Sávan seammás ahte buot sápmelaččat oskot iežaset rivttiide, eaige dohkket buotlágan gáibádusaid, lohká eadneolmmoš.

Son lohká duomu leat hirbmat geahpádussan vaikko ii vel duostta oalát illudit, go ii leat čielgan guoddala go stáhta duomu vai ii.

 

Loga maid: Vuittii stáhta vuostá fas

 

Ain guhkes geaidnu

Ánne Márjá Siri goitge lohká dál fertet ráhkkanit ođđasit boazolohkoprosessii ja lohká alddis vuordámušaid ahte stáhta dál váldá vuhtii olmmošlaš beliid ja rivttiid proseassas.

– Ii dušše bohccuid ja eatnamiid. Lea dieđusge ain guhkes geaidnu, ja dá lei dušše lávki ovddos. Sávan maid Norgga Boazosápmelaččaid Riikkasearvi lea dán háve eambbo gozus ja bargagoahtá áššiin, lohká Siri.

Jovsset Ánte Sara lea lágastan stáhta vuostá go oaivvildii ahte njukčamánu 10. beaivvi mearrádus 2014:s, ii lean lobálaš ja dán lea maid diggi cealkán.

 

Duođaštit ođđasit boasttuvuođaid



Norgga Boazosápmelaččaid Riikkasearvvi jođiheaddji Ellinor Marita Jåma ii leat ollen lohkat duomu ollislaččat, muhto su reakšuvdna lea ahte lea illubeaivi ja stuorra vuoitun Jovsset Ánte Sarai.

– Illudan su dihtii, go dieđán ja ádden ahte leamašan hui lossa ja gáibidahkes ášši. Dál son oažžu ođđasit duođaštuvvot ahte mearrádus lea lobiheapme ja proseassa ii leamašan buorre, lohká Jåma.

 

Loga maid: Lágamánnerievttis eará ákkat go diggegottis ledje

 

Lea gozus
Ánne Márjá Siri sávaldahkii ahte NBR ferte leat gozuid alde vástida Jåma ahte sii leamašan gozuid alde ja bargan boazologu áššiin čađat.

– Mii leat geahččalan olles boazologu heivehanproseassas cuiggodit ja váruhit boasttuvuođaid. Mu mielas leamašan NBR gozus ja leat ain dan buot čoahkkimiin, lohká Ellinor Jåma.

 

Ávvir ii leat fáhten Jovsset Ánte Sara ságaide odne, go son lea siiddas.

 

På forsiden nå