NAMMADUVVO IHTTIN RÁĐĐELAHTTUN: Bargiidbellodaga parlamentáralaš jođiheaddji Per Mathis Oskal nammaduvvo njealját ráđđelahttun sámediggepresideantta Vibeke Larsena unnitloguráđđái. Govven: Inga Marie Guttorm

Dá lea presideantta njealját ráđđelahttu

Sámediggepresideanta nammada Per Mahtis Oskala njealját ráđđelahttun Sámediggeráđđái.

10:54 Njukčamánu 09. beaivi 2017
Ođastuvvon: 09.03.2017 - 10:58

Sámedikki Bargiidbellodat lea evttohan parlamentáralaš jođiheaddji Per Mahtis Oskala ráđđelahttun, sorjjaskeahtes sámediggepresideanta Vibeke Larsen lea dohkkehan evttohusa ja galgá ihttin nammadit su, iežas njealját ráđđelahttun.

Sámediggeráđis galget vihtta ráđđelahttu oktan presideanttain.

 

Gealdagasas

Per Mahtis Oskal ii hálit olus kommenteret ášši ja vástida sihke jo ja ii gažaldahkii illuda go ođđa ámmáhii.

– Šaddá dieđusge gelddolaš, lohká son.

Oskal ii loga vel čielgan gii galgá šaddat bellodaga parlamentáralaš jođiheaddji.

Per Mathis Oskal gullá Gáisi birii ja lea boazosápmelaš.

 

Luohttámuš Per Mathisii

Sámediggepresideanta Vibeke Larsen lohká sus lea luohttevašvuohta Per Mathis Oskalii, iige lean váttisvuohta dohkkehit ovddeš bellodatustibiid árvalusa.

Ođđajagemánu loahpas beakkehii ahte Vibeke Larsen bálkesta Bargiidbellodaga dálá presideantaevttohasa Ronny Wilhelmsena ráđis ja ieš guđii bellodaga ja doaibmá sorjjaskeahtes presideantan.

– Mus eai leat makkárge luohttámuš váttisvuođat Per Mahtisii. Dásseárvvu ektui lei čielggas ahte fertii leat almmáiolmmoš, ja guovllu fertii maid vuhtii váldit, čilge Larsen.

 

Bargiidbellodaga sávaldat

Sivvan dasa go presideanta lea ádjánan nammadit ođđa ráđđelahttu ja easka otne nammada, lea Bargiidbellodaga sávaldat.

– Bargiidbellodagas lei sávaldat vuordit nammademiin ja sivvan dasa lea go son gii nammaduvvo ferte guođđit dievasčoahkkima, ja mu áddejupmi lei ahte lei hástalus oažžut várrelahttu su sadjái dán vahkkui, muitala Vibeke Larsen.

Son maid lohká ahte su mielas lei dát jierpmálaš mearrádus, go Per Mathis Oskalis ii lean vuos makkárge rolla ráđis, muhto lei eambbo ávkkálaš doalahit su dievasčoahkkimis.

– Son ii leat ovddidan makkárge áššiid, iige galgga vástidit gažaldagaid. Ii son leamašan mielde gieđahallamin makkárge áššiid ovddalgihtii, čilge Larsen guhte lea ilus ahte ráđđelahttuášši lea čielggaduvvon.

 

 

 

 

 

 

 

På forsiden nå