Fughetta fas lea čáppa muhto brutála installa­šuvdna, mas vihtta leikejuvvon bohccogoruda ráhkadit musihka ja čuovgga. Govven: Polly Yassin

Bohccogorudat ráhkadit musihka ja čuovgga

Geir Tore Holma este­tihkka, mii lea seammá poehtalaš go aktivistta­lašge, deaivvada čájáhusas Lakta/Grensesnitt, Sámi Dáidda­guovddážis.

08:50 Njukčamánu 09. beaivi 2017
Ođastuvvon: 09.03.2017 - 14:39

Geir Tore HOlm:

Geir Tore Holm lea bajásšaddan Olmmáivákkis, Gáivuonas. 

Son orru ja bargá Ringstada dálustis Skiptvetas, Østfoldas. 

Oktagaslaš video-, foto-, bázze-, performánsa- ja installašuvdnabargguid lassin son lea gaskkustan, čállán ja oahpahan dálá áiggi dáidaga birra dan rájes go gearggai Troandima dáiddaakademiijas 1995.

Son ásahii Balkonga Troandimis 1993, ja geavaha ásodaga čájáhusbáikin. 

Dáiddapraksisa gaskavuođaid guorahallamat ja dáidda praktihkalaš gulahallamin leat leamaš váldun su doaimmain.

Ruovttuvuđot vásáhusat leat láidestan ollu iešguđetlágan doaimmaide.

2003:s son bargagođii guimmiinis Søssa Jørgenseniin Sørfinnset skuvllain/ the nord landain Gildeskålas, Nordlánddas. 

Prošeakta lea ain jođus ja guovddážis lea luonddudoallu, ekologiija, máhttolonohallan ja huksendoaibma.

Geir Tore Holm lei Tromssa dáiddaakademiija prošeaktajođiheaddji 2007:s. 

Son lea dál Oslo dáiddaallaskuvlla stipendiáhta dáiddalaš ovdánahttinbarggus, prošeavttainis Poetikk for estetikk i endring (Rievdi estetihka poetihkka). 

Sus lea Stáhta dáiddáriid dáhkiduvvon boahtu ja son oaččui John Savio-bálkkašumi 2015.

Holm lea okta Sámi ja Skandinávia mávssoleamos dáiddáriin ja čájáhusas oainnát valjis su bargguid.

Go Geir Tore Holm muitala eallima ja luonddu birrajođu birra, mo olbmot orrot planehtasteaset, das mii áitojuvvo ja das mii addá eallima, de muitalusas leat seammá ollu vuorddekeahtes reflek­šuvnnat go konkrehta akšuvnnat.

 

Stuorámus sierračájáhus
Geir Tore Holm deavdá SDG lanjaid valljivuođain sihke hivvodaga ja sisdoalu dáfus.


Geir Tore Holm.
Govven: Søssa Jørgensen

Maŋimuš jagiid máŋggabealat bargguin, mat leat stuorrát ja meditatiivvat, son jearrá mo lea olbmo gaskavuohta luondduin, mo lea olbmo ja luonddu eallima birrajohtu.

– Dárkilis dárkumat ja detáljjaid ovdanbuktin ovttastahttojit reflek­terejeaddji kommentáraide. Reflekšuvdna ja jurddašallan ovttas­tahttojuvvo konkrehta doaibmamii, dávjá giehtalagaid geavatlaš máhtuin ovdamearkka dihte luonddudoalu, birgejumi ja giehtadáiddu birra. Geir Tore Holm bargá viidát iešguđetlágan mediaiguin ja ovdanbuktinvugiiguin, dieđiha Sámi Dáidda­guovddáš preassadieđáhusas.

Lakta-čájáhusas beasat vásihit fotogovaid, video, videoinstalla­šuvnna, bácciid ja objeavttaid. Dat lea Geir Tore Holma dássážii stuorámus sierračájáhus.

 

Bohccogorudat ráhkadit musihka ja čuovgga

Čájáhusas stuorra saji váldá erenoamáš Lakta-videoinstallašuvdna, man mielde olles čájáhus lea ožžon nama, ja mas jiekŋa deaivvada geđggiin projekšuvnnas, mii deavdá olles seainni.

Fughetta fas lea čáppa muhto brutála installa­šuvdna, mas vihtta leikejuvvon bohccogoruda ráhkadit musihka ja čuovgga.

Čájáhusas leat lagabui 40 dáidda­barggu, nu ahte buot lea láhččojuvvon erenoamáš čájáhus­vásá­hussii.


Jiekŋa deaivvada geđggiin Lakta čájáhusas.
Govven: Geir Tore Holm.

Čájáhusrahpan
Čájáhus rahppojuvvo njukčamánu 9. beaivvi 2017:s dii. 18, ja dáiddár Geir Tore Holm lea mielde rahpamis.

Geir Tore Holma čájáhusa ovdanbuktima lassin juoigaba Biret Risten Sara ja Ravna Antti Guttorm ja fállat geahppa guossoheami.

Fáddásánit
Kultuvra

På forsiden nå