GIELDA- JA OĐASMAHTTINMINISTTAR: Jan Tore Sanner muitala ráđđehusa áigut juohkit Divttasvuona guovtti sadjái ja ovttastahttit dan eará suohkaniiguin. Vuorkágovva: Inga Marie Guttorm

Áigot juohkit Divttas­vuona suohkana

Ráđđehus áigu árvalit ahte nuortadavábealli ovttastahtto Áhkánjárggain ja Bálagiin maiguin Divttasvuona suohkanstivra háliidii ovttastahttot, oarjelulábeali árvala ráđđehus ges ovttastahttit Hápmiriin, fuolahan dihte Julevsámi birrasa.

15:27 Njukčamánu 20. beaivi 2017
Ođastuvvon: 21.03.2017 - 10:58

Sámediggi lea ovttaoaivilis dán evttohussii.

– Divttasvuotna lea mearridan ahte áigot ovttastuvvot eará suohkaniiguin. Mun oaivvildan min leat gávdnan čovdosa mii vuhtii váldá sihke julevsámi giela ja kultuvrra, ja mii vuhtii váldá Divttasvuona dárbbu šaddat oassin stuorát suohkanis, lohká gielda- ja ođasmahttinministtar Jan Tore Sanner.

Olgeža, Ovddádusbellodaga, Risttalaš álbmotbellodaga ja Guruha gielddareforbmašiehtadusas Stuorradikkis gohččo ráđđehusa árvvoštallat berrešii go Divttasvuona oarjjabealli ovttastuvvot Hápmiriin.

Áhkánjárgga, Bálaga ja Divttasvuona suohkanstivrrat leat ovdal meannudan seammasullasaš mearrádusaid ja háliidit ovttastuvvot ja hukset ođđa suohkana.

 

Eanaš sápmelaččat ásset oarjelulábealde

Divttasvuona suohkan lea dál áidna julevsámi suohkan sámegiela hálddašanguovllus.

Hápmir ja Divttasvuotna leat ovdalis ráhkadan áigumušsoahpamuša ovttastahttima birra, mas mearridedje ahte ođđa suohkan galgá leat oassin sámegiela hálddašanguovllus.

Eatnašat Divttasvuona julevsápmelaččain ásset oarjelulábeale suohkanis, dan guovllu evttohit ge laktit Hápmirii.

 

– Nanne buohkaid bálvalusaid

Gielddareforbmabarggus lea Gielda- ja ođasmahttindepartemeanta gieskat konsulteren Sámedikkiin Divttasvuona suohkana ovttastahttima ja juohkima birra.

Sámediggi lea ovttaoaivilis gieldda juohkima dáfus.

– Divttasvuona suohkan lea dál juhkkojuvvon Divttasvuona bokte, julevsápmelaččat ásset eanas oarjelulábeale vuona. Suohkana juohkin nanne bálvalusfálaldaga olles Divttasvuona álbmogii, ja addá buori fálaldaga julevsápmelaččaide, lohká Sanner.

 

Ovddidit proposišuvnna ovdal beassážiid

Eatnašat Norgga julevsápmelaččain ásset Divttasvuonas, Hápmiris ja Oarjjelij Foalddas.

Julevsámegiella lea hearkkes dilis, ja oahpahuvvo dušše moatti skuvllas.

Áimmahuššan dihte Divttasvuona nuortadavábeali julevsápmelaččaid giellavuoigatvuođaid, áigu departemeanta ovttasráđiid Sámedikkiin gulahallat suohkaniiguin vejolaš čovdosiid birra.

Ráđđehus ovddida Stuorradiggái árvalusa oktasaš proposišuvnnas gielddastruktuvrraid rievdadusaid birra, ovdal beassážiid.

 

 

 

 

På forsiden nå