Ruoŧa Sámedikki ságadoalli Håkan Jonsson. Govven: Nils Johan Vars.

Ruoŧa Sámedikki njunuš suhttan journalisttaide

Maŋŋel go media lea dárkkistan Sámedikki ekonomiija, de ii áiggo sámediggeáirras Lars-Jonas Johansson searvat báddejuvvon jearahallamiidda, ja Sámedikki ságadoalli ii áiggo šat searvat journalisttaid jearahallamiidda.

14:27 Guovvamánu 16. beaivi 2017

Dáid dieđuid buktá Sameradion & SVT Sápmi duorastaga, maŋŋel go sii guorahalle Sámedikki ekonomiija, ja gávdnan dieđuid ahte Sámediggi lea máksán honorára loge geardde muhtin professorii.

 

Čavggadeaba media

Sihke Landspartiet svenska samer bellodaga Lars Jonas Johansson ja Jakt och fiskesamerna bellodaga Håkan Jonsson leaba čálašan Sámeradio neahttasiiddu kommentárabáikkis ja cuiggodan journalistta barggu áššis.

Håkan Jonsson čavggada Sámeradio, ja čuoččuha ahte sii eai muital duođaid eai ge atte máŋggabealálaš ovdanbuktima áššis.

Lars-Jonas Johansson lohká iežas rahčat luohttámušain Sámeradio vuostá, go áššit orrot bealálaččat ráhkaduvvon.

Boađusin áššis lea ahte Håkan Jonsson lea addán dieđu ahte son ii šat searvva Sámeradio jearahallamiidda boahtteáiggis, muhto ii leat áigon ášši váidit Ruoŧa mediaid dárkkistanlávdegoddái, čállá Sameradion.

 

Mediaid áššedovdi kommentere

Göteborga Universitehta mediaetihka ja sátnefriddjavuođa áššedovdi Jan Strid lohká dán leat vuorjašuhtti treandan go politihkkarat, geat stivrejit, eai áiggo hupmat mediain.

Strid lohká maid ahte aŋkke ii gávdno gáibádus ahte politihkkaris lea bággu vástidit journalisttaide, čállá Sameradion & SVT Sápmi.

Fáddásánit
Ođđasat

På forsiden nå