– De moddjestehket buohkat

Ovdal go doalai iežas sártni, de fertii stáhtaministtar govvestit vuos daid olu olbmuid geat ledje čoahkkanan Troanddima torgii rahpandoaluide.

14:31 Guovvamánu 06. beaivi 2017
Ođastuvvon: 06.02.2017 - 14:56

– Gal dat leat hárve ná ivdnás čoahkkaneamit Norggas go odne, logai stáhtaministtar dan botta go coahkkalii gova.

 

Ministarat máŋga

Norgga stáhta gal lei bures ovddastuvvon Tråante 2017 doaluid rahpamiin odne.

Doppe ledje earret eará stáhtaministtar Erna Solberg, gielda- ja ođasmahttinministtar Jan Tore Sanner, eanandoalloministtar Jon Georg Dale, stuorradiggepresideanta Olemic Thomessen ja maiddái stáhtačállit.

 

– Dat lei sámi ásahusaid álgu

Solberg doalai maid sártni rahpamis.

– Lihkku beivviin buohkaide. Lea stuorra illun munnje leat dáppe Tråante 2017 rahpamis, logai son earret eará.

– Dán beaivvis lea stuorra mearkkašupmi, erenoamážit sápmelaččaide go dát beaivi čalmmustahttá ahte dán beaivve 100 jagi dassái organiserejedje sápmelaččat iežaset vuosttaš geardde, ii dušše Norggas muhto maiddái Ruoŧas. Dat lei vuođđun dasa maid dál oaidnit, álgo vuosttaldeapmi dáruiduhttimii ja sámi ásahusaid álgu, lohká Solberg Ávvirii.

 

– Soaitá dehálaš ođasmahttit sámepolitihka

Maiddái Erna Solberg mieđiha ahte sápmelaččat ain rahčet muhtin ráje daid seamma áššiiguin maid dahke dalle 100 jagi áigi.

– Juo, muhtin áššit soitet ain seamma ja muhtin áššiiguin leat diehttelasat ollen olu guhkkelii, muhto diehttelasat lea dehálaš gáhttet giela, ahte giela ovdánahttojit ja ahte kultuvrra ja kulturovdáneami gáhttet. Diehttelasat lea ealáhusvuođđu rievdamin, sápmelaččat dahket buot dan seamma go dážat. Sápmelaččat leat maid iešguđetlágan bargguin nu ahte soaitá leat veahá dehálaš ođasmahttit sámepolitihka maid, lohká stáhtaministtar.

 

– Jus livččii okta ášši man dáfus oaivvildat ahte leat ain bázahallan, man de namuhivččet?

– Mun oaivvildan ain ahte addit seamma vejolašvuođaid giellaoahpahusas lea deháleamos.

 

– Maid ráđđehus bargá dan dáfus?

– Mii han gal bargat dainna earret eará go bidjat johtui doaimmaid oččodan dihte eambbo oahpponeavvuid, nu ahte lea oassin min áŋgiruššamis. Dattege lea dehálaš maid dadjat ahte dáid oččodit lea maid oassi Sámedikki barggus.

 

 

Fáddásánit
Ođđasat

På forsiden nå