Almmuhus

Almmuhus

Vuordime ođđa ráđđelahtto­evttohusa

Árjja ráđđelahttu Inger Eline Eriksen muitala Ávvirii ahte leat vuordime Bargiidbellodaga ođđa ráđđelahtu evttohusa, gii galgá Ronny Wilhelmsen sadjái. Vuorkágovva: Anne Rasmus

Sámediggeráđđi leat vuordime evttohusa Bargiidbellodagas gii sáhtášii ráđđelahttun Ronny Wilhelmsena sadjái. Dan botta leat gaskaneaset juogadan ovddasvástádussurggiid.

IFinnmark dieđihii odne ahte Bargiidbellodat ii áiggo ovddidit eahpeluohttámuša sámediggepresideantta Vibeke Larsen vuostá. (Plussa ášši).

Larsen guđii bellodaga vahkkoloahpas. Dan son dagai go Bargiidbellodaga nominašuvdnalávdegoddi válljii Ronny Wilhelmsena presideanttaevttohassan boahtte čavčča sámediggeválggaide.

 

Juohkán Wilhelmsena ovddasvástádussurggiid

Dat mearkkaša ahte Vibeke Larsen dál ii gula guđe ge bellodahkii, ja stivre Sámedikki sorjjasmeahttun presideantan.

Árjja ráđđelahttu Inger Eline Eriksen ii loga maide rievdan Vibeke Larsena ektui, vaikko ii leat šat Bargiidbellodagas.

– Son doaibmá presideantan dassá go dievasčoahkkin ovddida eahpeluohttámuša. Mis lea ovttasbargošiehtadus mii lei vuođđun, ja dat ii leat rievdan.

Eriksen čilge ahte ráđđi lea dál vuordime vástádusa Bargiidbellodagas, ahte galget go nammadit ođđa ráđđelahtu.

– Lea lunddolaš ahte Bargiidbellodat evttoha ođđa ráđđelahtu, go sii leat dat stuorámus bellodat. Muhto ferte ain muitit ahte lea presideanta gii nammada ráđi, ja buot lea su duohken.

– Lea dehálaš ahte buot bellodagat ovttasbarget, vaikko Vibeke Larsen ii leat šat Bargiidbellodagas. Min ovttasbargu ráđis ain joatká, lohká Eriksen.

 

Eriksen muitala ahte ráđđi lea dál gaskaneaset juohkán ovddasvástádussurggiid mat ovdal gulle Ronny Wilhelmsenii.
– Dan mii dahkat gaskaboddosaččat, ii leat vel čielgan boahtá go okta ge su sadjái, muhto dál fertiimet juohkit, go ii sáhte nu ahte ii ovttas ge leat dat ovddasvástádus, lohká Eriksen.

 

Ii váikkut ovttasbarggu

Olgešbellodaga sámediggeráđđelahttu Lars Philip Paulsen ii loga Bargiidbellodaga siskkáldas stuimmi váikkuhit movt ge sin ovttasbargui.

– Olgežii ii leat váttisvuohta ovttasbargat Bargiidbellodagain, dat ii leat min riidu. Mii eat doarjjo siskkáldas stuimmi, dat lea Bargiidbellodaga duohken.

Son deattuha ahte ráđđelahtuid ja várrepresideantta nammadeapmi lea presideantta bargu.

Paulsen lohká ahte deháleamos lea ahte šaddá ráfi Sámedikkis, vai presideanta beassá dahkat daid válljejumiid maid ferte.

– Olgeš doarju presideantta Vibeke Larsena mearrádusaid. Buoremus dál lea ahte presideanta bissu, ja mii doarjut ahte son joatká presideantan bellodaga haga, lohká Paulsen.

 

Eai leat mearridan gean evttohit

Jođiheaddji Bargiidbellodaga Sámepolitihkalaš ráđis Inga-Lill Sundset ii astan searvat jearahallamii, go Bargiidbellodagas leat čoahkkimat odne ja ihttin.

– Mii eat leat vel mearridan maid boahtit bargat, vástida son SMS bokte go Ávvir jearrá gean bohtet evttohit ráđđái, jo bohtet go oba ge evttohit olbmo ráđđái.

På forsiden nå