Amanda Kernell ráhkaduvvon filbma «Saemien vïrre» lea okta njeallji sámi filmmain mat čájehuvvojit Berlina Filbmafestiválas. Govven: Nadja Hallström

Sámi filmmaid čájehit Berlinas

Njeallje sámi filmma galget čájehuvvot Berlina Filbmafestiválas guovvamánus. Sámi filmmat leat oassin filbmafestivála árktalaš álgoálbmogiid oasis NATIVE.

16:35 Ođđajagimánu 19. beaivi 2017
Ođastuvvon: 19.01.2017 - 16:43

Ceavzilvuohta, dálkkádatrievdan, lokaliseremat ja gažaldagat eamiálbmogiid rivttiid birra ja iešmearrideapmi leat fáttát mat leat oassin dán jagáš festiválas.

Katja Gauriloff «Kuun metsän Kaisa» filbma, Amanda Kernell ođđaseamos filbma «Saemien vïrre», Elle Maija Tailfeather filbma «Bihttoš» ja Ken Are Bongo filbma «Sámi boddu» leat sámi filmmat mat čájehuvvojit Berlina Filbmafestiválas guovvamánus.

 

Álgoálbmotfilmmat riggodahkan earáide

– Juohke guovllu fokusis čájeha Native man máŋggageardásaččat ja hutkát álgoálbmotfilmmat leat, ja man ollu riggodaga dat addet internašunála filbmadahkkiide, lohká festiválajođiheaddji Dieter Kosslick festivála neahttasiiddus.

Guovtti eahkeda galgá Canada ambassáda veahkkin lágidit paneladigaštallama eamiálbmot filbmabuvttadeddjiiguin ja internašunála gussiiguin. Maŋŋel digaštallama čájehuvvojit filmmat.

 

På forsiden nå