VÁLLJEJUVVUI: Bjørn Inge Mo lea Bargiidbellodaga sámediggepresideantaevttohas Gáisi válgabiires. Preassagovva: Bargiidbellodat Gáisi válgabiires.

– Vuoigatvuođaáššit šaddet dehálačča

Bjørn Inge Mo lea válljejuvvon Bargiidbellodaga sámediggepresideantaevttohassan Gáisi válgabiires.

12:15 Golggotmánu 02. beaivi 2016
Ođastuvvon: 13.06.2017 - 13:50

Bargiidbellodaga listu Gáisi válgabiires 2017-2021:

1. Bjørn Inge Mo, Gáivuotna

2. Synnøve Søndergaard, Tromsa

3. Per Mathis Oskal, Ráisavuotna

4. Sylvi Vatne Pedersen, Gálsá

5. Kjetil Johnsen, Leaŋgáviika

6. Gunn Bårdsen, Tromsa

7. Brynjar Andersen Saus, Tromsa

8. Geir Johnsen, Tromsa

9. Eirin Kjær, Báhccavuotna

10. Odd Roald Nilsen, Báhccavuotna

Ovttas Synnøve Søndergaardain, Per Mathis Oskaliin ja Sylvi Vatne Pedersen lea Mo bajimusas Bargiidbellodaga (Bb) listtus Gáisi

válgabiires, maŋŋil nominašuvdnačoahkkima lávvardaga.

– Mun giittán luohttámuša ovddas. Mis lea viehka nanu listu, oaivvilda Mo.

 

Guolástanpolitihkka dehálaš

Bjørn Inge Mo lea Tromssa Bargiidbellodaga ovddeš jođiheaddji, sátnejođiheaddji Gáivuonas ja Bargiidbellodaga váldostivrra lahttu.

Son válljejuvvui ovcciin jienain guđa jiena vuostá, nubbi evttohas lei Per Mathis Oskal.

Mo lohká ahte vuoigatvuođaáššit erenoamážit guolásteamis šaddat deháleamosin go bargagohtet prográmmain.

– Mii fertet leat čielgasat vai sihkkarastit guolásteami guovddáš mearrasámi guovlluin. Ii dušše sápmelaččaide muhto olles dan guovllu álbmogii, lohká son preassadieđáhusa bokte.

 

Kveanat ja gávpotsápmelaččat

Mo čujuha maid dasa ahte Tromssa Bb buori muddui lea prográmmii bidjan dan seamma.

– Dasa lassin háliidan ahte mis šaddá čielgasat politihkka mii heive maid kveanaide, go mis leat olu seammalágan hástalusat. Šaddá maid dehálabbot heivehit politihka earret eará Álttá, Tromssa, Budejju, Troanddima, Bergena ja Oslo gávpotsápmelaččaid mielde. Olu sápmelaččat ásset doppe, ja sámepolitihkka ferte maid fatmastis sin, lohká Mo.

Gáisi válgabiirii gullet Gáivuona, Omasvuona, Ivggu, Gálssá, Tromssa, Báhccavuona, Málatvuomi, Bearddu, Leaŋgáviikka, Birgi, Doaskku, Ránáidsullo ja Ráisavuona suohkanat.

 

Bargiidbellodaga sámepolitihkalaš konferánssas skábmamánu 19. ja 20 beivviid mearridit geat šaddaba bellodaga sámediggepresideanta- ja várrepresideantaevttohassan.

 

 

På forsiden nå