Govva: SCANPIX

Sisáibmu sáhttá dahkat du buohccin

Čavčča hávskohallan ii leat dušše buorre rupmašii. Steariidnačuovggat, muorraboaldin ja coiccuheapmi nuoskkida sisáimmu viesus.

14:18 Golggotmánu 17. beaivi 2016

Gintalat ja dolla ommanis lea dábálaš čakčat, muhto dat dagaha ahte lassánit partihkkalat ja gásat áimmus go boldojuvvojit. Partihkkalat mat sáhttet leat várálaččat du dearvvašvuhtii go vuoiŋŋat ja dat bohtet du geahppáide.

 

Sáhtát buohcagoahtit

Go mii vuoigŋat partihkkaliid, de mannet dat geahppáide ja varrii ja bisánit dohko. Dat sáhttet dagahit ástmá, allergiijaid ja borasdávdda geahppáide. Lea maid stuorát riska oažžut eará dávddaid, mat eai njuolgut oro gullame áibmui ja vuoigŋamii, de go gáldnanvihki ja eará váibmovigit.

 

Logi diŋgga mat nuoskkidit sisáimmu:

Gintalat

Duhpátsuovva

Coiccuheapmi (røkelse)

Dolasteapmi

Lievdi

Gavjjat

Lieđđegavja

Elliid guolggat/unna divrrit guolggain

Áibmolávttas ja guohpa

Kemikálat ovdamearkka dihte ráidnenbuktagiin

Movt mihtidan sisáimmu

Oaivebávččas, gosahat ja golgi čalmmit sáhttet leat sivat ahte vuoiŋŋat nuoskkiduvvon sisáimmu. Go mihtidit áibmokvalitehta, de lea sáhka guovttelágan nuoskkideamis.

Okta lea sirddašeaddji gásat ja stoffat áimmus maid gohčodit VOC. Dat nubbi nuoskkideapmi lea áibmopartihkkalat. Kárbondioksiidakonsentrašuvdna, áibmolávttas ja temperatuvra leat mielde váikkuheames áibmokvalitehta.

 

Jus áiggut iskat kvalitehta sisáimmus ruovttus, de sáhtát geavahit áibmokvalitehta mihtidanrusttega. Rustet mihtida sisáimmu, ja beasat geahččat bohtosiid appas, vaikko gos leat.

 

Rávvagat movt buoridat sisáimmu iežat ruovttus:

Lonut gávnniid dávjá ja doalat viesu ráinnasin. Geavat bassansáibbuid main eai leat kemikálat dahje sáibbuid mat leat dohkkehuvvon Norgga Ástmá- ja allergiijasearvvis. Biggot viesu ollu vaikko lea čoaskkis, muhto fuomáš ahte girdigavjjat sáhttet leat ollu áimmus jus orut gávpogis. Jus it sáhte biggohit dálu, de sáhtát geavahit áibmoráidnenrusttega. Jus válddát sisa njuoska biktasiid ja skuovaid, de ásat sierra saji gosa bijat daid goikat.

Fáddásánit
Ođđasat

På forsiden nå