SEARVÁ GILVUI: Hárjánan stuorradikkepolitihkkár Helga Pedersen lohká iežas searvat sámediggepresideantagilvui jus fal Bargiidbellodat nammada su. Vuorkágovva: Berit Marie Lise Eira

Helga Pedersen searvvašii presideantagilvui

Hárjánan stuorradikkepolitihkkár lohká iežas leat gearggus geahččalit njeaidit Aili Keskitalo eret presideantastuolus.

10:16 Čakčamánu 06. beaivi 2016
Ođastuvvon: 06.09.2016 - 10:18

Bargiidbellodaga nominašuvdnalávdegoddi Nuortaguovllu válgabiires leat ožžon Helga Pedersena lohpidit searvat sámediggeválggaide.

Son vuolgá válgabiire vuosttaševttohassan, ja lea maid lohkan ahte vuolgá Bargiidbellodaga sámediggepresideantaevttohassan, čállá iFinnmark.

 

Áigu albma barggu dahkat

Lávdegoddejođiheaddji Per Ivar Stranden lohká válgalávdegotti leat ovttajienalaččat ovttaoaivilis ahte Pedersen galgá vuosttaševttohassan.

Go Pedersen lea njunnošis de jáhkket Bargiidbellodaga beassat fápmui boahtte jagi sámedikkeválggain.

– Lea hui, hui somá go Bargiidbellodat namuha mu presideantaevttohassan. Muhto nammadeamit eai leat vel leamaš. Deháleamos munnje lea dahkat albma barggu sámi áššiid ovddas, makkár ámmáhii dal jo gárttan maŋŋil válggaid, lohká Pedersen ieš iFinnmark áviisii.

 

Hárjánan politihkkár

Helga Pedersen lea bajásšaddan Deanodagas Deanus.

Son lea stuorradikkeáirrasin leamaš 2009 rájes, ja lei Bargiidbellodaga parlamentáralaš jođiheaddjin 2009:s gitta 2013 rádjai.

Son lei Bargiidbellodaga nubbinjođiheaddji 2007:s gitta 2015:i, ja lei Jens Stoltenberga nuppi ráđđehusas guolástusministarin 2005-2009, dalle lei nuoramus ministtar.

Fáddásánit
Ođđasat

På forsiden nå