Kulturministtar Linda Hofstad Helleland, Scandic Meyergården koahkka Svein Jæger Hansen, Rana suohkana sátnejođiheaddji Geir Waage, Saltdal suohkana sátnejođiheaddji Rune Berg ja Arctic Race of Norway beaivválaš jođiheaddji Knut-Eirik Dybdal. Preassagovva.

Suovasbiergu máilmmiolahussan

1242 suovasbiergomállásiin 60 minuhtas olahedje máilmmiolahusa mannan sotnabeaivvi poláragierddus Nordlánddas.

12:04 Borgemánu 15. beaivi 2016

Badjelaš 250 kg bohccobiergu ja 200 kg vilgeslávkeaioli fertejedje guossohit máilmmiolahus geahččaleamis. Koahkka lei hui duhtavaš go čielggai ahte ledje nagodan olahusa.

– Mis lei mihttu guossohit 17 mállása juohke minuhtas, ja dainna leimmet olahit 1000 mállása. Go nagodeimmet eanet go iežamet mihtu, de lei erenoamáš suohtas, muitala koahkka Svein Jæger Hansen.


1242 suovasbierggu láibbiin guossohedje olbmuide ja olahedje máilmmiolahusa. Preassagovva.

Kulturministtar maid mielde boradeame

Kulturministtar Linda Hofstad Helleland lei maid mielde boradeame suovasbierggu.

– Biebmu lei hirbmat njálggat! Ii lean dušše máilmmiolahus, muhto biebmu lei maid erenoamáš njálggat, muitala kulturministtar go lei máistán suovasmállása.

 

Buorre mokta vaikko arvvii ija

Lágideami jođiheaddji ja poláragierddu meahcástanráđi beaivválaš jođiheaddji Knut Berntsen, lei duhtavaš lágidemiin.

– Mii leat ilus go nagodeimmet máilmmiolahusa. Mis ledje 300 tealttá dáppe, ja vaikko lei arvi dán ija, de lei dan dihte buorre mokta olbmuin, muitala Berntsen.

Fáddásánit
Ođđasat

På forsiden nå