DÁLKKODIT EPIDEMIIJA-BUHCCIID: Salekhard gávpoga buohcciviesus dikšot buhcciid, mii lea hálddahusguovddáš Jamalo- Nenetsk autonoma guovllus oarjedavve Sibirjás. Govva: Google Maps

Dearvvašnuvvame dáđvesonahagas

30 olbmo geaidda lei njommon dáđvesonahat-dávda Jamal-guovllus Ruoššas, leat dearvvašmuvvame ja besse duorastaga ruoktot buohcciviesus.

13:48 Borgemánu 05. beaivi 2016

Lagabui golbmalogi olbmo leat dálkkoduvvon antibiotihkain Salkhard buohcciviesus Sibirjás maŋŋel go buohccáje heaggavárálaš dáđvesonahagain. Sii leat boahkuhuvvon ja besset ruoktot vuolgit go ii leat šat heakkavárra. Dan dieđiha neahttabáiki Vesti Yamal.

 

Ollusat ain buohcciviesus

Birrasiid 70 olbmo, geain leat gávdnan dávdda dahje geaidda váruhit dan njommon, ožžot ain divššu buohcciviesus.

Jamal guovllus Ruoššas leat lagabui 450 olbmo dál boahkohuvvon dáđvesonahaga vuostá. 

 

Okta olmmoš jápmán

Ruošša stáhta ođasdoaimmahaga TASS loguid mielde leat 2300 bohcco ja okta nuorra bárdni jápmán maŋŋel go dát epidemiija leavvagođii Jamal guovllus suoidnemánu loahpas vuosttaš geardde 70 jahkái. Eiseválddit maid ráhkkanit boahkuhit moadde duhaha bohcco.

 

Dán heaggavárálaš bakteriija navdet leat ealáskan dán guovllus danne go jieŋat leat suddan garra báhkaid geažil suoidnemánus. Lea leamaš badjel 35 lieggagráda guovllus.

Fáddásánit
Ođđasat

På forsiden nå