Boazodoalli Jovsset Ánte Sara sávvá dál beassat ráfis bargat bohccuiguin.

Vuittii stáhta vuostá

Sis-Finnmárkku diggegoddi lea cealkán duomu ja leat fámohuhttán stáhta boazologumearrádusa Jovsset Ánte Sarai.

14:36 Njukčamánu 18. beaivi 2016
Ođastuvvon: 26.01.2017 - 15:04

Otne lea Sis-Finnmárkku diggegoddi cealkán duomu áššis gos boazodoalli Jovsset Ánte Sara lei lágastan stáhta vuostá, go ii dohkkehan mearriduvvon boazologu iežas siidii. Stáhta lei mearridan sutnje 75 heakka.

Sis-Finnmárkku diggegoddi lea fámohuhttán Eanandoallo- ja biepmodepartemeantta njukčamánu 10. beaivve mearrádusa, mas gáibiduvvui Jovsset Ánte Sara siiddaoasis geahpidit boazologu.

Duomus daddjo ovttajienalaččat ahte 75:ain heakkain ii leat vejolaš birget boazodoalus, ja danne rihkku stáhtamearrádus riikkaidgaskasaš olmmošvuoigatvuođaid.

 

Beassá ráfis guođohit ealu

Jovsset Ánte Sara lea ilus go vuittii dikkis.

– Mearrádus mearkkaša ahte beasan ráfis bargat bohccuiguin. Stáhta leamašan dego jallas beana mu ealus, lohká lihkolaš Sara.

 

Illubeaivi

Jovsset Ánte Sara ii loga iežas ollen duomu lohkat go lea meahcis, muhto lohká iežas ožžon dieđuid telefovnna bokte.

– Mus eai leamašan makkárge jurdagat, vuoittán go, vai in. In leat duosttan smiehttat dan birra. Otne lea illubeaivi, lohká Sara movttegit.

 

Fáddásánit
Ođđasat

På forsiden nå