Muitominta galgá leat dábálaš ruhtan, ja soaittát fuomášit dan eará 20 ruvnnuid gaskkas. Čájáhusgovva, Ávvir.

Gilvalit hábmet muitominta

Norgga Báŋku lea mearridan almmuhit 20 ruvdnosaš sirkulerenmintta sámiid vuosttaš riikačoahkkima 100 jagi ávvudeamis Troandimis.

15:34 Guovvamánu 29. beaivi 2016
Ođastuvvon: 29.02.2016 - 15:35

Ruđas galgá leat erenomaš hápmi muitun go lea 100 jagi áigi go vuosttaš sámi riikačoahkkin lágiduvvui Troandimis 1917s. Elsa Laula Renberg lágidii vuosttaš riikačoahkkima Norggas. Čoahkkin lei Metodismagirkus Troandimis guovvamánu 6.-9.beivviid ja lei historjjálaš dáhpáhus ja dehálaš lávki sámi álbmogii. Dáhpáhus lea maid vuođđun manne guovvamánu 6.beaivvi ávvudit sámi našunálabeaivin.

 


Elsa Laula Renberg lágidii vuosttaš riikačoahkkima Norggas.

 

 

Vuohki čájehit historjjalaš dáhpáhusaid

Sámediggi sáddii Norgga Báŋkui evttohusa ráhkadit sámi muitominta muhtin jagiid dás ovdal. Lea Norgga Báŋku váldostivra ja Sentrálabáŋkohoavda geat mearridedje ráhkadit dán muitominta.

– Lea Norgga Báŋku vuohki čájehit erenomaš ja dehálaš historjjálaš dáhpáhusaid Norggas, muitala Norgga Báŋku gulahallan direktevra Therese Riiser Wålen.

 

Dáiddagilvu jođus

– Dál lea dáiddárgilvu jođus ja leat čieža sámi dáiddára geat leat bovdejuvvon leat mielde gilvvus evttoheame makkár dát muitominta galgá oaidnit. Go Norgga Báŋku lea válljen vuohkkaseamos dáiddaevttohusa, de almmuhuvvo mintta hápmi ja dáiddára namma ovdalaš geasi, muitala Wålen Ávvirii.

20-ruvdnosas muitominta galgá leat eará 20 ruvnnuid fárus, ja lea vejolaš gávdnat dákkár ruđa eará ruđaid fárus.

Fáddásánit
Ođđasat

På forsiden nå