EATNI ČILGEHUS: Jovsset Ánte Sara eadni, Ánne Márjá Siri, lei odne iđit vihttánin Sis-Finnmárkku diggegottis. Govven: Inga Marie Guttorm

– Jovsset Ánttes lei boahtteáiggi doaivva boazodoalus

Odne iđit lea nuorra boazodoalli, Jovsset Ánte Siri, eadni čilgen Sis-Finnmárkku diggegoddái makkár beroštupmi bártnis lea unnivuođa rájes leamašan boazodollui.

10:27 Guovvamánu 02. beaivi 2016

– Jovsset Ánte oinnii alddis boahtteáiggi boazodoalus, čilgii su eadni, Ánne Márjá Siri, odne iđit dikkis. Odne diibmu ovccis álggi nubbi beaivi dikkis mas nuorra boazosápmelaš, Jovsset Ánte Sara, lea stevdnen stáhta Eanandoallo- ja biebmodepartemeantta go oaivvilda eiseválddiid mearridan sutnje menddo vuollegis boazologu, 75 heakka.

 

Unnivuođa rájes beroštan boazodoalus

Jovsset Ánte Sara eadni Ánne Márja Siri lea gohččojuvvon vihtanin, ja son čilgii diggái makkár beroštupmi su bártnis lea boazodollui. Advokáhta Trond Biti vuosttaš gažaldat lea maid boazodoallu mearkkaša Jovsset Ánte Sarai.

Eadni vástida ahte boazodoallu mearkkaša ollu. Jovsset Ánte lei logejahkásaš go eadni fuobmái man stuorra beroštupmi sus duođai lea. Eadni muitala ovtta mátkki birra go ledje beaivvemátkki finadeamen ádjá guossis. Jovsset Ánte biehttalii vuolgimis ruoktot go áddjá lei meahccái vuolgimin.

– Dalle fuomášin duođaid man hállu ja beroštupmi sus lei bohccuiguin barggat. Go oaččui siidaoasi siesástis, de šattai hui movttegin ja oinnii boahtteáiggi boazoealáhusas, muitalii eadni diggái.

 

Ii leat ceggen ealu

Ánne Márjá Siri ii loga bártnis ožžon mielde man dehálaš lei posišoneret, vaikko earát orohagas leat ceggen ealuideaset ovdal go unnidangáibádusa mearrádus bođii stáhtas, man mielde buohkat šadde gorrelogu mielde unnidit.

Ánne Márja Siri muitala mii galgá leat dáhpáhuvvan go orohat ii šaddan ovttaoaivilii siskkáldasat, de behttui ja dat buvttii sutnje hui váivvi.

Eadni Ánne Márjá Siri čilgii maid dikki ovddas bártnis ruhtadili birra, ja mo bearaš lea veahkehan su boazodoalus. Siri deattuha ahte lea áibbas dehálaš ahte siiddas lea veahkit.

– Mis lea dušše okta siidaoassi, min bearrašis lea okta siidaoassi. Siiddas ii leat vejolaš birget 75 heakkain, ii leat doaibmavuođđu. Go ii leat doaibmavuođđu, de ferte heaitit. Sáhttá dieđusge joatkit moadde jagi, muhto eat mii leat agibeaivvi, muhto go geahččá guhkkelii, de lea 75 heakka heaittihanlohku, dajai eadni dikkis.

 

 

 

 

 

 

 

 

 

 

 

 

 

 

 

 

Fáddásánit
Ođđasat

På forsiden nå