Garra čuoččuhus ráđđehusadvokáhtas: –Saboteren go lea ceggen ealu

Ráđđehusadvokáhtta Ida Thue dadjá iežas loahpasánis ahte Jovsset Ánte Sara lea saboteren go lea lasihan boazologu maŋemuš jagiid, ja leat dál njeallje geardde eambbo bohcco go sutnje lea mearriduvvon.

12:28 Guovvamánu 03. beaivi 2016
Ođastuvvon: 03.02.2016 - 12:43

Ráđđehusadvokáhtta Ida Thue čuoččuha ge iežas prosedyras ahte Jovsset Ánte Sara lea ieš leamašan mielde posišoneremin go lea lasihan ealu maŋemuš jagiid, ja čujuha Sara čilgehussii dikkis ahte sus leat lagabui 300 bohcco vaikke sutnje ii leat mearriduvvon eará 75 bohcco.

– Ii leat imaš go siskkáldasat leat riiddut, go ii leat váldán ovddasvástádusa. Sara lea diehtán ahte orohagas lei unnidangáibádus, lei mielde mearrideamen boazologu orohahkii. Nu lea diehtán ahte boazolohku leamašan beare allat ja ahte sus ii leat šiehtadus earáiguin ahte son galgá sáhttit lasihit. Nu lea diehtán ahte unnideapmi lea jođus, ja válddii riskka go válddii badjelasas siidaoasi, ákkasta Thue diggái.

 

Čujuhii boazodoalloláhkii

Son čilge go orohat siskkáldasat eai nagodan soahpat ja ráhkadit oktasaš plána, de lágalaččat sáhttá stáhta mearridit boazologu siidaosiide gorrelogu mielde, namalassii ahte siidaoasit galget unnidit seamma mađe proseanttaid dan boazologus mii sis lei njukčamánu 31. beaivvi 2012:s.

 

– Meannudan su seamma go earáid

Ida Thue deattuha ahte Jovsset Ánte Sara lea meannuduvvon seamma láhkái go earát geat lea ožžon unnidanmearrádusa. Thue deattuha ahte sii geain leat stuorra ealut, sii leat unnidan eanemus, ja gorrelogu vuođul unnideapmi ii dáhpáhuva jus iešmearrideapmi siskkáldasat orohagas livččii doaibman.

– Váldonjuolggadus lea ahte orohat ieš galgá mearridit. Njukčamánu 31. beaivvi 2012:s ledje Jovsset Ánte Saras 116 bohcco, čujuha ráđđehusadvokáhta. Stáhta oaivvilda Sara lobiheamet ceggen ealu ja dáhttu dikki váldit 116 heakka vuođđun go meannuda ášši.

 

– Birge buorebut

Ida Thue čujuha maid stáhta áššedovdiid guorahallamiidda, maid rehketbihttá čájeha ahte Jovsset Ánte Sara birge buorebut 75 heakkain go 116 heakkain ja čujuha dutkiid dieđalaš loguide.

 

 

 

 

 

På forsiden nå