Beassan mielde Ealáhusgárde­prográmmii

SIVA lea mearridan váldit Sápmi Ealáhusgárddi fárrui iežaset Ealáhusgárdeiprográmmii mii doaibmá 2011 rájes 2021 rádjái.

18:55 Juovlamánu 10. beaivi 2015
Ođastuvvon: 11.12.2015 - 08:44

– Dát lea illubeaivi Sis-Finnmárkku ealáhusaide ja obbalaččat guvlui, lohká Sis-Finnmárkku Ovddidanfitnodaga beaivválaš jođiheaddji, Marianne Balto.

Váttis beassat mielde
Beassat mielde Ealáhusprográmmii lea váttis, ja leat oktii buot 70:s leamaš mielde, ja dál leat vel 47 ealáhusgárddi mielde.
– Vaikko SIVA:in váldet ollu ealáhusgárddit oktavuođa jahkásaččat, de leat dán jagi dušše guokte fitnodaga váldon fárrui, ja Sápmi Ealáhusgárdi leage nubbi dain, lohká Balto.

 

Dorjon ásaheami
Balto muitala Sápmi Ealáhusgárdi ovttasbargá Porsáŋggu, Unjárgga, Deanu ja Kárášjoga gielddaiguin, ja maiddái Sámediggi ja Finnmárkku fylkkagielda leat mielde das.

 

– Ágga manne Sápmi Ealáhusgárdi válljejuvvui beassat fárrui prográmmii, lei go ealáhusat ieža leat positiivvat ja leat šiehtadusaid bokte mielde ealáhusgárddis. Guovllu ealáhusain leat čielga mihttomearit iežaset oassálastimiin, sihke eaŋkalfitnodahkan ja maiddái fitnodagaid surggiin. Sápmi Ealáhusgárddi guovlu lea viiddis, ja mii leat hui duhtavaččat go namuhuvvon orgánat leat mielde doarjumis ealáhusgárddi ásaheami. Dat lea maiddái leamaš dehálaš oassi SIVA positiivvalaš mearrádusas, lohká Balto.

24 fitnodaga mielde
Balto lohká mearkkašupmi fitnodagaide mat leat oassin ealáhusgárddis lea ahte gávdno ruhta sidjiide ovdánahttit fitnodagaideaset.  
– Nu movt álgoálgi fitnodagat sáhttet oažžut mentoriid, ja hukset fierpmádagaid ja alddiineaset ferte fokus ovdánahttin. Mis leat dál 24 Sis-Finnmárkku fitnodaga mielde, ja vaikko Guovdageainnu suohkan ii leat mielde ealáhusgárdeprošeavttas, de leat doppe guokte fitnodaga mielde Sápmi ealáhusgárddis, lohká Marianne Balto.

Fáddásánit
Ođđasat

På forsiden nå