Čájáhusgovva. Govven Sergey Gavrilov

Unnán diehtu áššis

Suoma Alimus hálddahusriekti dohkkehii manan gaskavahku 93 ođđa olbmo sápmelažžan Suoma beal Sámedikki dáhtu vuostá. Gáldu álgoálbmotvuoigatvuođaid gelbbolašvuođaguovddáža jođiheaddji Laila Susanne Vars mielas Norgga beal sámiin leat unnán dieđut dán áššis.

16:34 Golggotmánu 02. beaivi 2015
Ođastuvvon: 05.10.2015 - 09:52

Ollu sápmelaččat Suoma beale ledje hirpmástuvvan Suoma alimus hálddahusrievtti mearrádussan. Eiseváldiid mearrádus buvttii sihke digaštallama ja suhtu sámeservodahkii Suoma bealde. Digaštallamis vuhtto sámeduhtatmeahttunvuohta. Sihke sosiála mediaid ja earret eará Yle Sámi bokte leat sámi politihkkárat, sámi artisttat, sámi servodatberošteaddjit muitalan iežaset oainnuid.

Dovddus sámi nuorra artistta ja diktačálli Niillas Holmberg lei odne oassálasttán MTV3 “Huomenta Suomi” -iđitprográmmii girjjemeassuid oktavuođas mat lágiduvvojit Turkus Suoma bealde. Prográmma sáddaga loahpas artistta lei válljen baicce bilkidit Suoma stáhta dan sadjái go lohkat čáppa divttaid.

 

– Mun in sáhte dál lohkat divtta mu iežan diktagirjjis.



NIILLAS HOLMBERG  hirpmastuhttii TV-kánala iežas čuožžuhusain. Govven: Ávvir- vuorkágovva.

– Dát jahki lea leamašan Suoma stáhtii berošmeahttunvuođa čoaskačoalat jahki sámegažaldagaid oasil. Stáhta ii atte sápmelaččaid ieža mearridit das, gii lea sápmelaš. Suopma ii nappo gudnejahte riikkaidgaskasaš eamiálbmogiid guoski soahpamušaid. Stáhta ii hálit gullat sápmelaččaid dákkár áššiin, mat gusket sámeguovllu eanangeavaheapmái. Seammás dat goittotge ávkkastallá ja addá jorggu govva sámekultuvrra riggodagain go ruhtada video, mii vuovdala Suoma mátkeealáhusa, logai Niillas Holmberg njuolga kamerai, jorgalii Niilasa Holmberga sámegillii Yle Sápmi.

Loga maid: – Dego Dávvet Goliáhta vuostá

 

Dáppe olbmuide lea váttis ipmirdit ášši

Gáldu álgoálbmotvuoigatvuođaid gelbbolašvuođaguovddáža jođiheaddji Laila Susanne Vars mielas Norgga beal sámemediat eai muital nu ollu das mii lea dáhpáhuvvame dáid beivviid Suoma beal Sámis. Dan ahte Suoma Alimus hálddahusriekti dohkkehii manan gaskavahku 93 ođđa olbmo sápmelažžan Suoma beal Sámedikki dáhtu vuostá. Vars mielas dábálaš olbmuide lea váttis ipmirdit ášši.

Laila Susanne Vars. Govven: Gavrilov Media/Sergey Gavrilov.

– Mun lean veahá ságastallan dáppe Guovdageainnus mii lea goit hui guovddáš sámiguovlu, ja mun gulan olbmot eai ipmir dien movt Suomas lea vejolaš ahte láhka addá dego ovtta hálddahusriektái válddi mearridit gii lea sápmelaš, čilge Laila Susanne Vars.

 

Mediat galget čeahpibut gokčat

Gáldu jođiheaddji mielas lea Yle Sápmi dassážii leamaš čeahppi muitalit ja čilget ášši.

– Mii leat hui ollu lohkan Yle Sápmi čállosiid. Ja dat gokčet hui bures dán ášši. Nu guhká go dat čállet davvi sámegillii de mii nagodit maid lohkat dan, vástida Vars.

Muhto su mielas dáppe Norgga bealde lea unnán fuomášupmi dán áššái, ja ávžžuha earenoamážiid sámemediaid čállit eanet dán ášši birra.

– Dál lea jo Suoma riikkamediain leamaš dát ášši. Mun sávašin ahte Norgga riikamediat oainnáše dán ášši go dát lea dan mutto stuorra politihkalaš- ja riekteášši Suoma beal sápmelaččaide, čilge Gáldu jođiheaddji.

Son jáhkká earenoamážiid sámemediat nu go NRK Sápmi ja Ávvir sáhtáše buktit eanet dieđuid áššis danne go olbmot sihke Norgga- ja Ruoŧa bealde dárbbašit diehtit eambbo áššis.

– Mii geat bargat vuoigatvuođaáššiiguin juohke beaivvi oaidnit ahte Norgga ja sihkkarit Ruoŧa bealde Sámis livčče dárbu oahppat suoma vuogádaga. Movt dat doaibmá, maid sámediggeláhka dadjá ja movt sápmelašmeroštallan lea Suomas. Ja manne geavai nie.

Go eanet sámit ipmirdit ášši de eanet doarjja boahtá Norggabeal sámiin. Dá mii čuohcá Suoma beal sámiide čuohcá dieđusge midjiide maid go mii leat okta álbmot, loahpaha Laila Susanne Vars.

Loga maid: Bovdejit miellačájeheapmái

 

 

Fáddásánit
Ođđasat

På forsiden nå